上周五美股低收，杜指跌84點，連升4日後調整些少，好正常。港股逐漸好樣，有回吐要買嘢，炒P輪未係時候。
滙控C輪3976：滙控（005）喺倫敦連升4日，上周五收845便士（折124.1港元），單日升5便士。華爾街滙控收79.54美元（1股當5股，折123.94港元），單日升0.40美元。外圍滙控少見高過港市（123.50元），滙控有得睇。
滙控C輪戰場，已轉移到遠期嗰批。滙控始終係慢動作嘅藍籌，如果兩三個月後先至升得好好睇睇，揸近期C輪者則蝕晒章。遠期C輪則冇咁快縮溢價，最昅得過嘅係3976，最熱門係佢。3976明年1月初到期，輪價51仙，溢價4.5%，槓桿率24.2倍（有效12.1倍），引伸波幅13.2%。炒即市，則始終係4441。
長實C輪3560：長實（001）上周五收71.25元，升3格。上周五推介嘅C輪3560，見過15.2仙後，收13.8仙，跌1.4%。小小超增持20萬股，銀碼有限，但有象徵意義。3560冇跟正股升，更抵炒。
3560喺6月中夠鐘，溢價3%，槓桿率51.6倍（有效19.8倍），引伸波幅18%。暫時成交金額最大嘅，仍然係3560。炒遠期C輪，揀3869，當然要畀高啲溢價。
澳美滙價C輪3511：上周一推介嘅澳元兌美元C輪3511，收19.8仙，1周跌幅18%。澳元冇加息，澳元應跌唔跌，因為早前已跌定先．3511喺5月尾夠鐘，溢價0.9%，槓桿率30.2倍（有效23.5倍），引伸波幅10.2%。澳元上周五喺紐約市造好，3511今朝會裂口高開。
章盛