民主黨創黨主席李柱銘同煲呔曾都係虔誠教徒，兩人認識多年私交唔錯，馬丁噚日喺電台節目中話，𠵱家香港事務其實唔係由香港位姓曾嘅人話事，而係由喺北京姓曾名慶紅位仁兄揸弗。佢話𠵱家佢都有為煲呔祈禱，希望天主畀條明路佢行，希望煲呔唔好好人做壞事，出賣香港人。
馬丁喺節目中又點咗隻《奇妙恩典》（AmazingGrace）畀煲呔聽，因為佢做特首都好艱難，就算煲呔要做一啲佢唔想做嘅事，最後都可以得到天主救贖。
七月舉行嘅特首補選，睇形勢煲呔好有機會自動當選，馬丁話自己唔會參選，因為佢經常去外國批評特首小圈子選舉制度，走去參選有啲唔妥，但就唔反對民主黨主席李永達試吓，因為達仔冇咁多機會去外國。
達仔噚日正式喺黨內爭取提名，準備爭取民主黨支持參選特首。獲自己友提名唔難，不過要搵足一百個選委提名就好渺茫嘞。
傳真︰2623-9278
電郵︰[email protected]