今個星期3區可以用混戰嚟形容！《在世界中心呼喚愛》、《談情共舞》同為今個星期上場，戲碼亦都唔錯；前者以《情書》式濃情，大戰鬼佬版《談談情跳跳舞》！不過最後以銷量後來居上者竟然係《盜海豪情12瞞徒》！以上個聖誕檔粒粒星大片，再加貼住1區嘅到貨時間，真係俾佢上到位，如果追開《盜1》冇理由唔買今次《盜2》啫！
記者：朱崇德
還記得《盜2》在香港上演時，影評只屬一般，睇過DVD後，感覺絕非太差，可能大家對《盜1》的包袱太多，加上條橋同第一集好唔同，亦係對老影迷唔討好嘅原因。另外一提大家，《盜2》個碟價非常浮動，行貨Mark價$138，不過旺角、灣仔一啲大碟舖都已經下調至$90-$100，平賣新片！亦可能係佢去貨凌厲嘅一大原因。
《盜1》盜款 連本帶利還
承接上集《盜海豪情》，自拉斯維加斯賭場盜竊案後，以丹尼奧遜（佐治古尼飾）為首的11個大盜，正享受他們的1億6千萬盜款。但估唔到賭場主人泰利班納特（安迪加西亞飾）突然現身！而且好似大耳窿一樣，要佢哋2個星期內連本帶利將所有盜款一次還清。大家在無計可施下，決定齊齊出山大幹一筆！可惜唔知點解做乜都好似頭頭碰着黑，原來幕後還有飛天大盜同歐洲警察，向佢哋虎視眈眈，一眾大盜想全身而退，都好似幾難！
賊公計狀元才 故事Sell橋
今次《盜2》的聲畫表現一般，所謂賊公計狀元才，呢類戲主要係Sell橋，感覺上都可以接受，就算畀你炸機炸到砰砰聲都冇意思啦！
今集與上集最不同處，上集觀眾可看到幾位大盜事事順利，今集他們會遇上不少棘手難關。今集第一個難關就係請嚟《毒網》的嘉芙蓮薛達鍾絲演畢彼特的惹火舊情人！雖然嘉是歐洲刑警，但原來佢更是世界著名大盜之後人，這個賊婆娘下下預先洞悉11大盜的行動，最後還一一落網成擒，絕對是最棘手的敵人！
美、歐大盜 鬥智角力
成套片最有睇頭，先是開場冇耐，去打劫一個「閉殼」收藏家的夾萬！處處警鐘加24小時留家看守，11大盜竟然妙想天開想到升起間屋入去偷，可算是一絕！另外尾段的偷彩蛋，與法國影星雲遜卡素飾演的歐洲大盜鬥智角力，互爭第一功，亦見好笑緊張，結局都有點出人意表，雖有點自圓其說，但亦見有新意！
至於Bonus部份！都係好出人意表，大路的幕後工作人員評論、刪除片段等一概欠奉！只有電影預告片一則！真係簡單到估佢唔到！
價錢：$103（3區）
查詢：DVDPro（23326326）