已確認就嚟離開安永會計師事務所嘅主席兼合夥人胡定旭，噚日首次喺消息曝光後出現公眾場合，市場對佢離開嘅原因有多個版本，八方當然捉住佢唔放啦！佢同八方講，佢做會計師都做咗成三十年，都成五十一歲啦，唔想再日日飛咁辛苦，咪唔做安永主席囉！
佢叫八方千萬唔好寫佢離開安永，佢話大家日後重可以喺安永度搵到佢，佢都只係退居幕後啫，𠵱家搵緊接班人，好大機會都係華人咁話喎。八方諗，安永大陸咁多生意，同聲同氣點都好啲嘅！不過，呢位曾經係安永最年輕嘅合夥人，死都唔肯講會唔會保留合夥人地位。
胡生重話，𠵱家身為醫管局主席，差不多八成時間都係用咗喺醫管局，辛苦係辛苦啲，但當佢見到可以幫助到好多人嘅時候，乜嘢都抵番晒！八方又問佢會唔會考慮從政呢？佢都係笑而不答。
講多幾講，胡定旭索性將話題扯去佢最鍾意嘅跑馬仔，佢話「精英大師」平世界紀錄嗰次，佢咁啱唔喺香港，冇得親眼目睹呢個壯舉。佢重教八方，喺呢啲熱門馬度贏錢嘅秘訣，一定要揀多兩隻冷馬，再用單式三重彩拖，佢就係用呢個方法喺「精英大師」平世界紀錄嗰場馬，用「精英大師」做膽拖全餐，贏咗三倍賠率。八方睇番資料，嗰場馬跑第二同埋第三嘅馬，一隻有九十九倍；一隻有四十幾倍！
傳真︰2623-9278
電郵︰[email protected]