馬會總部有一個比較大嘅停車場，本來會員可以在此泊車五小時，當然完全免費，因為停車場位於黃泥涌道，近銅鑼灣，行去時代廣場只需五分鐘，於是有好多人停車在此，走去行街睇戲購物。大概太多人咁做，佔領車位唔郁，最近馬會實施絕招趕客。
惡佬明日前揸車駛入停車場，睇到標示，只准停三小時，第四小時收一百，第五小時收二百，第六小時收三百，超時收費幾犀利噃。佢喺銅鑼灣辦事完畢，急急腳咁趕返停車場，但吱吱咗咗就遲到咗半小時，惟有死死氣拎一百蚊出來畀錢，點知俾收銀小姐教訓幾句，當堂為之氣頂，認為既然罰款，收錢就算啦，點解重要窒親啲會員？
惡佬明話免費泊車係會員福利之一，假如馬會認為太多會員濫用（abuse）停車場嘅話，不如索性將馬會總部停車場改為收費停車場，每半個鐘頭收十五蚊，貴過附近啲商業性停車場，已經夠晒阻嚇性啦，使乜好似現在咁樣嚟嚇人呀！
九七以後，幾乎所有停車場都減價爭客，喺銅鑼灣搵停車場車位，易咗好多。不過凡有免費車位，使用者必定蜂擁而至，馬會總部停車場甚為方便，有便宜唔用就違反經濟法則。所以呢個免費停車場好容易被部份會員濫用，正如公立醫院急症室被好多人濫用一樣。
左丁山叫惡佬明唔好為一百蚊停車費而勞氣，惡佬明話：「一百蚊當然冇問題，問題係俾人當唔識字，唔識睇說明，先至咁激氣。」話時話，馬會會員之中，多數係老闆、高級行政人員或專業人士，平時唔慣俾人窒親，屬於handlewithcare類型，馬會職員服務會員，禮貌第一，笑容行先，包保冇錯。