上海期銅剛喺對上星期創出每噸3.4萬元人民幣新高，華藝銅業（559）有得諗。華藝前身星采，上年8月獲新主榮盛科技（1166）注入打銅桿加工業務，05年度中期（12月止）已因呢壇新鮮熱辣業務，致純利急升2.6倍至2604萬元。
原材料高企，對中、下游企業本來唔係好事，但係，銅價高企，反而令華藝產品，有更好議價能力，最新中期已經說明一切。呢勻銅價急升，華藝受惠，估計05年度純利，應該可以上到4000萬元，PE12倍。再講，隨住華藝江蘇新廠房年中投產，為集團喺長三角呢個工業重鎮，打開缺口，並提供上10萬噸銅線加工產能，06年度業績可以睇高一線。
以華藝05年度預期15倍至16倍PE做目標，股價1.125元至1.2元，短線回報率最多25%。華藝上星期已經扯到上近1蚊短期橫行頂，一突破，好快到位，短線貨仔，有兩成以上回報，並唔輸蝕。
勵晶太平洋（575）最近3個月橫行於0.31元至0.34元之間，睇嚟無乜特別，只講一點，已經夠照。勵晶今年2月公布，獲第三者Leading，收購集團旗下投資控股BIH（40.2%）所控BridgeInvestment77.75%權益，總代價8.92億元。勵晶講明，因呢次出售Bridge所得款項，其中90%派出街。
計計數，勵晶現有股東將享潛在每股0.29元派息機會。最近停牌後通告亦講明，若然順風順水，預期呢壇交易會喺6月28日或之前完成。以勵晶潛在每股派息，幾乎等同現價，最遲兩個月，回報率講緊9成以上，係時候儲定貨底。
錢雋