有位頻頻擔正做女主角嘅歌手藝人，同一位出道兩、三年嘅小花歌手，近排忽然由湯碗面變成瓜子口面。
初時馮仁昭重以為呢啲係佢哋積極減肥嘅成果，但近日老友同馮仁昭報料，話呢兩位女星原來整咗容，接受近期好流行嘅Botox整容術，即係打肉毒桿菌針，除咗嗰兩位女藝人之外，有位嫁咗人嘅公仔箱阿姐，以及好多闊太都有試過。
聽講過程係將肉毒桿菌注射入塊面度，令到面部肌肉收縮，雖然每次打針收費只係六千至八千蚊左右，但藥力只可以維持幾個月，打開唔繼續打嘅話就會打回原形。
咁搞法咪好似吸毒上癮一樣？二十幾歲就開始打針，幾時打到佢老！到時搵唔到錢打針，咪人又老錢又冇！
吳建豪前晚喺砵蘭街一間夜總會拍攝電影《猛龍特警隊》，據知同場拍攝嘅重有MaggieQ。吳建豪凌晨十二點抵達現場，拍咗個幾鐘就收工。吳建豪上樓時戴住頂cap帽，之前重幫工作人員一齊攞道具，睇唔真重以為佢都係工作人員㖭。
關心妍（Jade）前晚出席浸會大學搞嘅歌唱比賽做嘉賓，佢經常做評判，見到有潛質嘅就會推介畀自己公司。噚日阿Jade重喺將軍澳中心出席「挪亞方舟驚世啟示」記者會，佢話呢套福音電影嘅票房接近四百萬，佢話：「有咁嘅票房係好難得。」
徐熙娣（小S）噚日喺台灣出席社交舞表演，佢着咗一件桃紅色嘅貼身性感舞衣，重同男舞伴大跳貼身舞，好鬼惹火。事後小S謙稱自己嘅舞姿值八十五分。馮仁昭最唔明白點解小S要將成個人搽到黑晒，唔通做「黑珍珠」真係型啲？當小S拍埋家姐徐熙媛身邊，一黑一白，相映成趣。
爾冬陞同方平噚日接受新城財經台訪問，大談投資心得。講到香港電影巿道差，上映數量唔多，爾冬陞話：「上年有六十套，有啲都好賣座。」佢認為內地盜版問題係最大影響，要政府配合。馮仁昭問佢會唔會向特首反映，爾冬陞就話：「都唔知邊個係，如果董生做番就拍手啦，不過你哋（指巿民）就慘。」
張玉珊噚日以修身堂主席身份喺金鐘出席一個投資創業講座。同場有啲老闆已經定下退休目標，張玉珊話：「唔敢定目標，驚唔成功，睇相佬話我二十五歲開始行二十幾年事業運，嗰時重擔心拍戲要拍到五十幾歲，𠵱家睇怕都望唔到退休年齡。」
曾志偉前晚喺君悅酒店出席仁濟醫院總理就職晚宴，重被委任為「仁濟醫院慈善獎門人」，會幫仁濟搞吓慈善籌款活動。志偉冇出席成龍生日會，因為啱啱喺北京返嚟，志偉本周四生日，佢話年紀大咗就想搞生日，爭取多啲時間同朋友見吓面。
