一代talkshow鼻祖許冠文即將在紅館舉行首個「棟篤笑」表演，他表示穿西裝上陣，獨自面對萬三名觀眾，感到十分刺激。他近日更經常陪伴太太打麻雀，聽取最新的八卦小道消息，吸取題材。
促成許冠文這次復出，居功至偉的除了擔大旗的製作人丘亞葵（Vigo）外，弟弟許冠傑（Sam）亦間接出了一分力，許冠文說：「阿Sam開咗三十八場演唱會，我就客串足三十八場，我嗰parttalkshow大概二十分鐘，講講吓又覺得幾好玩喎，Vigo又話最緊要好玩，游說足我三十八場，話出番嚟玩啦，卒之咪咁囉！」
一為神功二為弟子，許冠文娛人娛己，也在圓夢，他說：「休息咗十五年，一直都有三樣嘢想做，一係釣條百幾磅嘅大魚，早排真係畀我釣到喎，跟住就係做呢個talkshow，年底又拍埋自己嘅戲，嘩，人生都算係咁囉！」
棟篤笑表演形式有別於演唱會，一個人、一支咪加一套西裝，在台上講足兩小時，但許冠文卻認為首要應付的是香港人的心態，他說：「香港人最鍾意問抵唔抵睇呀？『抵唔抵』應該係問質素，如果人多場面大叫抵，容乜易？拉隊解放軍上去操咪夠啦。其實一個人上台，要面對三面台、萬三位觀眾兩粒鐘，有乜刺激得過咁呀，呢的咪抵囉！」
內容方面，許冠文實在要多謝董建華這名「超級出氣袋」一直提供題材，雖然董建華忽然下台，許冠文仍然借用「後董建華時代」來作話題，嬉笑怒罵。他說：「要多謝董生，冇咗佢呢幾年，真係少咗好多嘢講，就算佢落台都有好多嘢可以發揮。」
為做好準備，許冠文近來頻頻陪太太出席各大小雀局，目的是聽取最新的八卦小道消息，貼近民眾，他舉例說：「當年同劉天賜、鄧偉雄做電視節目《雙星報喜》，咁啱嗰排搭完飛機度咗一連串飛機笑話，點知佢兩個話未搭過飛機，唔識笑喎。」類似情況曾用在電影《賣身契》、《摩登保鑣》上，雖然票房不俗，但口碑卻不及前期的《半斤八両》及《鬼馬雙星》等電影，尋根究柢，跟他忽然富貴而脫離草根大眾有關，所以他今次希望能在太太的雀友身上取經，吸取題材。
許冠文雖然被稱為「棟篤笑」鼻祖，卻從未開過talkshow，他卻有一套自我開脫的想法：「唔緊要㗎，最緊要做得到，發明電影嘅都唔使第一個拍電影啦！」他解釋世事往往如此，就如早前無心插柳釣到大魚一樣，但只要不停追求，上帝都會怕煩而成全他。自言鍾情talkshow大半生，今趟終於輪到自己，許冠文說：「我鍾意咗咁耐，花咗咁多時間練同準備，呢趟都應該輪到我喇！」
