三月份過後，所有電影獎項塵埃落定，我個人覺得今年金像獎結果非常合理。但事後就有一些餘波，上星期香港影評人協會召開記者會講及政府沒有資助金紫荊獎的問題，然後報紙上出現一番熱烈討論同爭拗。其實我都唔知金紫荊班人講乜同想點。
首先大家要知道香港每年有三個電影獎項：第一，香港電影金像獎，由業內多個屬會組成金像獎委員會，每年通過一個有系統，有監察性嘅投票機制選出當年每個提名獎項的代表，然後在金像獎頒獎禮當晚揭曉得獎名單。產生方法簡單易明亦最具代表性。第二，香港電影評論學會大獎，電評會由香港藝術發展局資助，會員發表嘅電影評論文章經常在比較嚴肅嘅報章雜誌內看到。電評會每年會通過學術性討論選出幾個獎項，得獎名單會公布，然後有個少少嘅頒獎儀式，討論內容及得獎原因會以文章發表，任何人可上網查閱，百分百學術性，頒獎禮唔會有人唱歌跳舞，亦都唔會意圖轉播俾大家睇，我覺得係一個代表藝術成就嘅獎項。第三，金紫荊獎，香港影評人協會主辦，類似金像獎咁，大部份協會嘅會員其實我都唔知係乜嘢人，總之唔係電影從業員，亦都冇印象睇過佢哋有關電影嘅評論文章，我去過兩次，淨係記得有李蘢怡同E-kids唱歌，獎項產生嘅過程係點唔知道，得獎原因亦都唔會講你知。
其實我唔係對影評人協會有偏見，實際問題係我冇機會認識佢哋，除咗每年頒獎禮前打電話叫你去，其他聽到嘅都係佢哋爭取自己地位嘅新聞，咁我真係唔覺得你好有代表性喎。如果講嚟講去都係錢嘅問題，真係冇乜意思。