藝人猩猩舞王子行為出位，自從電腦鏡頭前露「咪」一役後，已經好耐冇佢消息，最近又見蒲頭，原來走咗去日本訪問佢偶像猿人王。為見偶像，猩猩舞王子甘願降為小記者；據說訪問現場佢不時手舞足蹈，情緒偶有激動，搶晒猿人王鏡，差點嚇親主人家。從此可知佢對猿人文化情有獨鍾。潮界經紀大隻標爆料：「咪睇猩猩舞王子平日脾氣暴躁，以為佢係壞人一個，佢不過為人率直，喜怒形於色啫。例如佢知道猿人王已經成為名牌『直角勝利』的VIP，去到邊都有貴賓式招待，喺日本表參道旗艦店重可以搭電梯上頂層睇獨家貨。
「既然自稱同猿人王咁老友，掹車邊都可以喺香港專門店威番陣啩，最近佢喺香港『直角勝利』買嘢時，便要店員Show啲VIP貨品畀佢睇，點知被當場拒絕，佢立即黑面，準備發脾氣，重響晒口話同猿人王非常老友，點解冇優待？其實店員有乜場面未見過？呢類自稱同某某老友嘅客人見唔少，惟有苦笑，兩招便打發佢走。猩猩舞王子悻悻然離去，但好快笑番。從此可見，佢份人同個細路冇分別，不過特別鍾意扭計啫。其實佢認真要練好啲繞舌歌藝同舞姿，唔係點做新一代香港嘻哈藝人？」
主持人：大食Jack
八卦熱報：[email protected]