「二．五」之爭，好似北方人有句老話話齋：「唱戲的不累，看戲的腰痛。」炒股佬唔理呢啲政治爭拗嘢，睇啱股票就落場炒幾轉，個市冇事，陰陰哋向上，恒指再升64點，呢鋪由美股上升、油價下跌所帶挈。
中芯C輪3868：窩輪龍虎榜上，中芯C輪佔咗好多隻。中芯（981）收1.58元，漲7仙。C輪3503做咗輪王，收3.9仙，升105%，有12球易手，金額四十幾萬。隻輪下月尾夠鐘，溢價10.1%，槓桿率40.5倍（有效12.8倍），引伸波幅34.1%。隻輪時日無多，行使價1.70元，最後墊煲底機會好大。
搵中芯C輪炒，正路對象係3868，10月初夠鐘，輪價20.1仙，溢價7.7%，槓桿率7.9倍（有效5.2倍），引伸波幅33.4%。隻輪壽命有番咁上下，咁嘅溢價唔貴，不過要入貨都係等正股回吐之時再諗，正股𠵱家都係偏高咗啲。
駿威C輪3529：汽車銷售數字有啲起色，駿威（203）收2.875元，爬升2格，C輪3529受帶動，由10.2仙，彈上13.2仙，升幅29%。隻輪重有唔夠3個月壽命，溢價11.7%，槓桿率21.8倍（有效8.4倍），引伸波幅39%，𠵱家上車，風險唔細。其他C輪，交投極疏，溢價14%至18%，亦係冇隻買得落手。
電盈C輪3956：電盈（008）近期啲爛泥味漸漸消失，最高4.625元，收4.525元，跌1格，個勢都係慢慢爬吓爬吓上去，有平貨，執C輪3956。
3956掛牌個幾月，數據比較啱睇，年底到期，輪價77仙，溢價2.8%，槓桿率5.9倍（有效4.4倍），引伸波幅30.3%。各輪中，成交最多係呢隻。
章盛