成龍前晚在君悅酒店出席池畔派對慶祝五十一歲生日，更一家三口切蛋糕。成龍在會上向賓客募捐，籌了十五萬捐給新疆學童。提到想不想祖名帶女友回家，成龍即說：「冇可能，佢應該識多啲女仔。」
成龍前日五十一歲生日，陳自強與楊受成在君悅酒店為他舉行池畔生日會，兒子房祖名、謝賢、狄波拉、余安安、何超瓊、MaggieQ及一班英皇藝人都有到賀。
成龍妻子林鳳嬌秘密入場，還與成龍共舞，更一家三口切蛋糕，場面溫馨。成龍呼籲賓客以後送禮物最好折現，捐助內地兒童讀書，工作人員隨即拿善款箱募捐，結果籌得十五萬，成龍說：「可以為一百五十個新疆兒童交一年學費，希望可以籌到錢幫佢哋起學校啦。」
至凌晨十二時許，成龍頭髮蓬鬆，腳步浮浮離開，看來有點醉意。問他林鳳嬌是否在場，成龍說：「唔知，冇見喎，佢同朋友一齊遲啲到啩，冇所謂啦，我同佢話佢生日我唔去，我生日佢都唔使嚟。」談到生日願望，成龍說：「香港要家和萬事興，家衰醜（口）不停，香港人和和氣氣，我短幾年命都冇所謂，我屋企都好和氣。」
問到想兒子房祖名送甚麼禮物，成龍說：「作啲有意思同勵志歌。」想不想兒子帶女友回家？成龍說：「冇可能，佢應該識多啲女仔，我唔注重生日，我同個仔講，我唔記得你生日，你都唔使記得我，做老竇唔係得一日，日日都係情人節、父親節同清明節。」
而房祖名接受訪問時，則謂沒有準備禮物給父親，問到父親送過甚麼禮物給他是最難忘的，祖名說：「畀我自由同創作，同畀我做自己想做嘅嘢。」房祖名昨日接受商台訪問時則說：「老竇從未試過同我慶祝（生日），有次佢經過我個派對，只係逗留咗三分鐘，打個招呼就走。嗰次算係咁多個生日中最異常嘅一次，但覺得冇所謂，因為佢係成龍嘛。」
問祖名有甚麼說話想對父親說，祖名謂：「我會盡力做好自己，唔好做損壞家聲嘅事。由《千機變II》到𠵱家我已經盡力，如果有乜令你失望，咁對唔住。」
此外，王傑對於被指豪賭欠債，他否認並表示對賭不感興趣，只曾在楊受成的船上玩，當時楊受成叫他捽牌，而且是賭老細的錢，王傑說：「我冇欠人錢，欠我錢嘅人就好多，重有我想澄清，我冇講過全香港藝人我捐錢最多。」
採訪：魯萍 攝影：林德雄、陳慧安
