電腦新產品:潮爆電子寵物溝iPod喇叭<br>我愛idog

電腦新產品:潮爆電子寵物溝iPod喇叭
我愛idog

穩佔MP3機市場一哥嘅iPod,眼見賣個滿堂紅,日本仔好醒目整番隻「跟尾狗」idog叨叨光!唔好以為佢齋玩「形神」,實際上佢重係陪iPod拖得出街用嘅專用Speaker!加埋7色LED曉鬧情緒嘅電子寵物反應,日本一出就斷貨,香港有小量貨源,賣價$498,值唔值真係見仁見智!

記者:朱崇德
攝影:周旭文
ImageGirl:Yuki

呢隻idog其實出自日本老牌大廠SEGA手筆,日本今個星期都係剛落場!功能多多、重要絕配iPod!雖知日本人Mac友多過PC用家,小狗登場價賤賣?4,179(約港幣$300),對番嗰邊生活指數,只係比一隻DVD貴?200;廠方原本已好樂觀預計全年銷售50萬隻,可惜頭批落場都係低估熱賣潛力;idog在日本現在差不多斷貨,想買只好等第二水!香港𠵱家有小量到貨,$498!來貨價加速遞運費,只算小炒,可以接受!

■連包裝都似足iPod。

idog畀面色你睇

摸吓idog個鼻、㩒吓佢個頭,會出現氹氹轉嘅橙色燈。

綠燈係普通狀態,冷冷淡淡,又或者唔郁唔叫咁囉!

Fling頭閃燈播歌

idog設計原概念擺到明嚟自iPod,除咗玩小白Feel外,白底機身加透明膠,質感真係同iPod好鬼似!難怪SEGA在日本發布會上,都以iPod同佢做伴!基本玩法係機身內置一個「最原始」嘅35mm音源插口,只要駁上iPod一類MP3或MD機,狗背的27mm喇叭單元就會播出音樂;盞鬼處係邊播歌,idog面部的7色LED燈會隨節拍強弱而閃動,而且頭部及耳朵亦隨之而起舞!整體音效算唔錯;加埋使用電池取電設計,攞出街隨身播亦得,絕對唔係裙腳仔「門口狗」!

■同大部iPod襯之餘,細細部shuffle放埋去,好似條狗餅一樣,夠晒盞鬼!

■35mm音源插口,基本對應所有MP3機及MD機等裝置。

■一個喇叭做晒左右聲道,有閒錢者,買兩隻就可玩埋左右聲道。

音樂反映情緒

電子寵物的互動玩法,亦是idog另一賣點;鼻、頭頂及尾巴按鍵都係基本反應區,每次按下都會有隨機的反應,主要是以狗面的7色彩虹LED燈,及Fling頭郁耳表達情感。此外idog還內置70首音樂,代表喜怒哀樂,憤怒時會發出有如星戰R2D2的短促聲效!至於開心時,就會播出長長的古典樂曲,加快速的閃燈表現興奮,都幾有趣。另外一提大家,其實狗面部份還有對光暗有反應的Sensor,播歌時向佢面上輕拂一吓,就會轉為第二首歌,都幾過癮。

■透明狗耳,會邊聽歌、邊上下擺動。

■狗面有光暗感應器,喺面前掃吓佢就會轉歌仔。

■同時按下狗鼻同頭頂,可調校音量。

隱藏功能idog學人話

idog現時只得日版,港人可能睇唔明說明書而未能盡玩佢。其實佢重隱藏有「收音功能」,如果大家對住佢講嘢,佢會先着綠燈,然後再轉紅燈時,就會有4秒錄音;之後idog就會跟從你的說話音節及節奏,以內置的電腦音樂Jam出一段同你語氣一樣嘅純音樂,idog學人話,真係唔可以睇小佢呢!

JCShop
電話:31022783
地址:香港銅鑼灣時代廣場8樓833號店

跟我講:Yuki你好靚呀!

■學人講嘢時,重會單起隻大眼!

電子寵物經典回顧

1999 AIBO一代炒過5萬
第一代AIBO出現簡直一鳴驚人!由於第一代屬限量生產,喺香港由二萬幾炒到過五萬!

2000 Techno跟風熱賣
AIBO紅咗,跟手有隻Techno,AI功能差一截,但都曉食骨頭做表情,千一蚊賣價令好多人投入電子寵物熱潮。

2001 AIBO二代最經典
後斷AIBO識唱歌跳舞,插MS更可附加不同玩法,互動性非常高。當年香港炒價亦達$25,000!

AIBO三代走晒樣
AIBO三代賣相似熊多過似狗!當年銷售情況一般,大概一萬蚊多啲就買到。

Necoro同真貓九成似
價錢比AIBO三代稍貴,最強係賣相似足真貓,不過睇落硬係覺得好恐怖!

2002 Poochi殺價搶客
$350平民價引到好多人入市,Poochi眼、耳、口、鼻、尾都有感應器,識同你玩兼有育成功能,當年全球銷量150萬隻!