睇邵善波寫嘅大文章，講到過去八年，沒有曾蔭權，就不會有今天的董建華，真係幾乎笑到死咗。董特首任期內，曾蔭權先做財政司，後做政務司，如果佢真係有料到，做得好嘅話，董特首嘅政績就唔會咁曳啦，民望就唔會咁差啦，健康就會正常啦……總之最衰係曾蔭權，唔止幫唔到手，直情搞彎晒㖭。真乃君非亡國之君，臣乃亡國之臣也。
既有蔡素玉（李八方稱之為蔡菜子，左丁山唔多明，究竟何謂蔡菜子？）批評曾蔭權於前，又有邵善波踩曾蔭權於後，本港傳統左派對曾蛇不滿之情，溢於言表，唔知中央如何下令中聯辦去擺平。順帶一提，何安達以蔡議員嘅《LetterToHongKong》為反面教材，向學生指出蔡議員嘅英語病句（見四月五日《星島日報》），中學生應該一睇，語文委員會主席田北辰更應該正視！
喺中資公司做咗好多年嘅會計Ｈ同左丁山講：「我哋咁多年重企得住嘅原因，就係老闆每次有大事，未接到北京清楚指示之前，講說話一定寧左勿右。左係人民內部矛盾，右係敵我矛盾，左得滯，最多事後做思想檢討；企錯去右邊呀，死咯，分分鐘革職查辦。據此道理，我覺得蔡素玉佢哋重未收到清晰指示，所以乘機發晦氣，鬧吓曾蔭權嘅英式作風、行事傲慢先，即使日後被上頭喝令糾正，最多話做吓思想調整啫，唔使死嘅。」
會計Ｈ講得未嘗無理。不過咁，本港左派從來都冇乜人才，因為過往嚟講，香港啲叻仔叻女一定唔會做左派，九七後，識時務者為俊傑，另計。一時之間，「新左派」未得信任，「舊左派」蜀中無大將。如果唔係嘅話，搵個人出嚟挑戰曾蔭權吖，笨。曾鈺成，係時候表演真功夫嘞！