人大常委會「一年一度釋法」，45條關注組幾個大狀氣上心頭，操上政府總部抗議，竟然遭拒諸門外，提出遊行抗議嘅湯家驊心情重未平復，繼喺立法會上嗚咽後，噚日喺《明報》個專欄「開天窗」，只寫上「無話可說」四個字，相信唔少香港人感同身受，面對兩個唔講道理、莫視法治嘅政府，重有乜好講？去年釋法，湯大狀已有「開天窗」紀錄，估唔到一年後又嚟多次，大狀冇呃稿費，佢逐個字收費，四個字就收四蚊。
另外，土共老大哥吳康民噚日亦喺報章撰文，譏笑「北角呂秀蓮」蔡素玉早前狂批煲呔「不成氣候」，一來蔡小姐唔係傳統左派，只係藉福建幫勢力壯大之際，被捧上位嘅「小將」，佢重話愛國陣營中不乏有識之士，若要同煲呔傾條件，根本唔使搵蔡素玉打頭陣明批曾蔭權，暗中攞着數咁低招。
傳真︰2623-9278
電郵︰[email protected]