羊，肉質嫩滑，不怕羶者讚其天下美味，怕羶者掩鼻遠之。「三號幹線餐廳」新推出的炭燒全羊，用18種香料醃製，BBQ做法把羶味減至最低，香可掩羶。味道搞對了，是時候挑食，燒烤爐上的小綿羊足重25磅，四肢朝天大大隻，哪部份最正最好味？吃時不妨請教總廚根哥，他會邊切肥羊邊教你如何揀飲擇食。
記者：陳漢榮 攝影：陳盛臣
模特兒：Blanche、Carrie（D8）
根哥教食羊
烤好了，七手八腳爭先恐後支解香噴噴的小綿羊之前，有否想過羊哪一部份最正？一般人的觀念認為經常運動的部位肉質最嫩，但總廚根哥卻有不同看法：「我覺得計埋脂肪比例同口感嘅話，羊鞍最正，其次係羊腿，羊腩排最尾。」
羊鞍：口感最好
「羊鞍即羊架，即係羊嘅肋骨部份，脂肪少肉薄最入味，咬落唔會成口油，黐住骨頭嘅薄肉最正，記得啃得乾乾淨淨。」
羊腿：啖啖肉
「後腿一定比前腿正好多！羊通山跑，經常運動腿肌肉發達，無錯係啖啖肉，但肉質比羊鞍嚡，點汁醬食會好啲。」
羊腩：食肉汁
「羊鞍對落部份就係羊腩，屬陰肉，所以脂肪積聚最多，皮薄最受火所以最香脆，咬入口一定成口油，肉汁最豐富。」
醃製時間要準繩
羊肉就如臭豆腐，愛者愛之愈羶愈好，惡者見之即閃，本沒有中間位，但炭燒做法就可解決這問題，因BBQ可帶出的一份獨特香口味，可掩羶又令羊肉不失其羶。肉種，餐廳用的是新西蘭羊，總廚根哥指定用7至8個月大的小綿羊，貪其脂肪比例剛剛好，不肥不瘦，肉質最嫩滑；肉香，則來自茴香粉、黃薑粉、大蒜、咖喱等18種秘製香料，綿羊洗淨後要醃製約11小時，時間太長羶味會全失，太短又不能入味，所以醃製時間要拿揑得絕對準確。
露天雅座氣氛好
餐廳分兩部份，歎慣冷氣可以坐室內，正中有大投射螢幕，邊啃羊髀邊看《大長今》，舒舒服服。大班人柴娃娃愛熱鬧的話，建議坐露天雅座，飲紅酒對住熊熊烈火，看一隻30磅的全羊如何烤至全熟金黃，已一樂！其實論氣氛，露天亦比室內好，因逢星期五六日有One-manBand表演，唱的是《Yesterday》、《Letitbe》這類懷舊Folksong，根哥說：「話明露天烤全羊，梗係露天坐先好Feel！隻羊全熟後會縮水得番25磅，但一樣夠20人食，到時你話食邊忽我就切邊忽，大班朋友爭食先夠過癮。」
單拖試一人餐
湊不夠20人吃全羊，單拖一人不妨一試「與羊共舞三式套餐」（$198）：
歐陸式紅酒羊仔髀扒
嗜肉者至愛，切開肉汁大量湧出，混紅酒燒汁同吃，啖啖肉勁飽肚。
葡式保雲蘇羊仔鞍
「保雲蘇」是葡國製法，選擇芥辣、麵包糠、香草與羊仔鞍同焗至表面香脆，口感不俗。
非洲式燒焗羊仔膝
用花生醬加沙嗲醬醃製，先燒後焗夠香口，亦可選擇用紅酒燜。
海盜式燒焗原隻羊仔髀$360
肉厚足4至6人食用，外皮燒得金黃，1日前預訂，上碟時根哥會逐片切，確保肉片塊塊都熱辣辣。
葡式炭燒魔鬼魚$88
7磅重魔鬼魚鰭一開七，單一份有差不多1磅重，用黃薑、紅椒、香茅醃製，煎香蘸沙嗲汁吃，最好吃是多條軟骨的骨膜部份。
白酒欖油三文魚墨魚麵$68
無濕𣲷𣲷的芡汁，爽口味帶酸，用挪威三文魚腩，咬落好彈牙。
FallinLove（前）、貴妃醉各$42
根哥建議吃羊歎紅酒，唔啱飲可試Cocktail，前者Tequila混Vodka、7-up加多粒鮮荔枝；後者士多啤梨酒、Vodka混鮮芒果肉，味超甜。
三號幹線餐廳（24831198）
地址：元朗八鄉錦上路148號（西鐵錦上路站乘的士約$20）
營業時間：12:00nn至12:00mn
座位：露天雅座120人，室內100人，35個車位。