人大常委釋法在即，新的特首注定係短命種，只有兩年任期，曾蔭權由清潔大隊長上位榮升特首，兩年都𦧲飯應啦。但係田北俊就有小小唔同，話晒都係自由黨黨魁，梗係要堂堂正正做五年，加上煲呔形勢比人強，所以話北京一拍板，田少就冇得玩。
不過，為咗要好好睇睇，曾經揚言「會認真考慮參選」嘅田少仍然要扮去馬，噚日又搵咗民建聯主席馬力再傾吓兩黨聯合推特首人選嘅問題，馬力個樣就一啲都唔熱衷；佢同八方講，大家只係「喺咁咦傾吓，唔深入」，之後重加句「睇吓點」，真係盡在不言中啦，而田少就死撐要睇埋下周民調結果先定奪。
八方都覺得田少其志可嘉，但佢定嘅三個考試，即係要睇中央、選委同民調嘅反應，又實在好難唔肥佬。聽聞田少同中央摸過底，究竟北京對佢參選有乜睇法？點知胡溫曾好醒，到𠵱家都唔表態；而八百選委就更縮骨，一方面捧自由黨，話佢哋都算愛國愛港人士，出嚟參選係好事，值得鼓勵，但係講到尾又加一句：中央好似屬意老曾喎；田少若出賽，佢哋好難做。
至於民調，田少可以慳番啲錢，因為佢肯定輸一大截，話就話田少乃直選產生，但係煲呔有天時地利，田少冇得揮。所以話田少如果真係想選，就唔好問咁多，正如吳光正話齋，參選嘅條件就係攞到一百提名票，呢一樣應難唔到田少，其他咪理，選過先知鹿死誰手。
北角蔡菜子冇講錯，煲呔真係一世好運；其實佢亦真係好勤力做嘢，八方數過，前日佢由早撲到晚，竟然全冇疲態；話說佢早上開會，中午去報業公會頒獎禮，下晝喺灣仔見區議會正副主席講釋法，又喺政府總部同外國傳媒再解一次話，然後同到訪嘅河南省省長李成玉會面，之後畀面吳光正出席有線活動，到咗夜晚，八方睇直播教宗大禮安息，竟然又見到佢阿哥官仔骨骨，打正個黑煲呔坐喺前面足足三個鐘，咁搏命，問你點頂？八方睇怕田少都唔想過啲咁嘅非人生活啩？
傳真︰2623-9278
電郵︰[email protected]