荷李活大隻佬雲迪素（VinDiesel）最近大改戲路，喺新片《湊仔型警》中走喜劇路線，反應相當唔錯，套片成功擊敗強勁對手《音樂型人》，登上美國票房冠軍寶座，雄踞本年度最佳開畫成績三甲位置，喺美國上映五星期，票房已接近七億八千萬港元！
雲迪素喺《湊仔刑警》入面飾演一位曾參加過唔少反恐任務嘅超級軍佬，因為一次任務失敗而令科學家被殺，佢為咗將功贖罪，負責照顧科學家五個年齡由九個月大至十八歲嘅麻煩仔女，當中包括鍾意亂揸車嘅十八歲女祖兒、經常離家出走嘅十四歲仔施夫、牙尖嘴利嘅八歲女露露、兩歲嘅大喊十彼得、隨時大小二便嘅九個月大ＢＢ泰拿，重有一隻咬住人唔放嘅惡鴨，搞到佢非常頭痛。
一向驍勇善戰嘅大隻佬就係咁遇上成世人最「攞命」嘅任務，由戰場勇士變成湊仔公，由荷槍實彈變成周身奶樽尿片毛公仔。不過，當雲迪素忙於對付五個細路同一隻鴨之際，敵人又從四方八面潛入，準備搶奪國家機密，佢因此再次變身成反恐戰士。
雲迪素喺片中除咗盡展佢嘅喜劇細胞之外，亦露出強勁肌肉同好打身手，將笑料同動作共冶一爐，帶嚟一部合家歡嘅搞笑動作片，難怪會受到美國觀眾歡迎。