稅局剛公布本港一班交最多稅嘅打工皇帝，八方覺得，其中一定有和黃大班霍建寧份。喺剛過去一年，佢老人家年薪接近一億三千七百萬元，其中花紅佔咗成一億二千五百萬。翻查和黃年報，大班喺二千年嗰陣，成功出售英國流動電訊業務，當年人工超過二億；之後每年人工都有一億二千萬，若果有打工皇帝獎，睇怕年年都攞硬。
上個星期和黃公布業績後，記者問過大班舊年有冇人工加，佢就唔肯答，話留待記者自己發掘。結果係點？自然係有人工（花紅）加啦。八方諗，舊年和黃分拆咗兩間公司（和記環球電訊、和記電訊國際）、又出售咗和記寶潔嘅投資，大班肯定豬籠入水。若果今年和黃分拆意大利3G項目，出年又分拆英國3G，你估佢會唔會更肥仔？
傳真︰2623-9278
電郵︰[email protected]