身患第三期肝癌的羅家英，日前與女友汪明荃拍拖往日本欣賞櫻花，二人恩愛地在櫻花樹下留影，卻沒有如家英哥出發前所言，在日本碌卡買戒指求婚。昨日家英哥到醫院看肝腎掃描檢查報告，醫生表示一切正常，逐步戰勝癌魔的他月中便會到橫店拍戲兩個月。
汪明荃與羅家英日前到日本大阪及京都旅行一星期，前晚二人恩愛返港，阿姐表示此行主要是欣賞櫻花。其實家英哥出發前曾揚言會在日本買戒指向阿姐求婚，但家英哥前晚否認其事，表示從沒求婚。
家英哥啟程往日本前，曾到九龍法國醫院做肝腎掃描檢查，昨日他往瑪麗醫院看檢查報告。昨日下午約一時四十五分，家英哥由一名女性友人陪同下駕車往銅鑼灣，他進入百德新街一幢大廈逗留約一個半小時後，再由一名男性友人駕車接載往瑪麗醫院覆診及看報告，他在醫院停車場下車後向記者說：「你哋唔好再跟啦，我動咗肝氣，亦都唔想你哋去煩醫生。」他在醫院逗留至下午五時許便回家。
事後家英哥接受電話訪問時說：「因為月中我要去橫店拍劇，加上噚晚去完旅行返嚟，我咪嚟見吓醫生，做吓檢查同順便睇報告。」問到家英哥報告結果如何，他說：「醫生話一切正常，進展良好，我嘅癌病正在康復中，但仍要按醫生吩咐定時食藥同唔可以太操勞。我月中去橫店，會逗留到六月先返香港，所以今次會攞夠藥去。遲啲我去到橫店，都會搵間好啲嘅醫院，定期驗血。」
雖然家英哥正逐步戰勝癌魔，但身體仍然虛弱，他說：「我都會好好調理，監製都答應唔會要我太辛苦，畀充份休息我，閒時又會做吓氣功當運動，但我就一定唔可以食太肥膩嘅食物，咁樣對身體會好啲。」
另一方面，前晚阿姐與家英哥步出機場時，同聲表示感到很累，阿姐說：「我哋去咗大阪、京都同其他地方，我喺火車上見到兩邊都有櫻花，可惜冇開，不過最後一日都睇到，好開心。你哋𠵱家快啲去睇啦，應該好靚。」
家英哥被問到有否趁機求婚時，他說：「冇，好攰，唔得閒求婚。都冇買戒指，我問佢要唔要，佢又話唔使，都咁耐啦，唔使呢啲世俗形式嘅。」有說女人口不對心，問家英哥日後會否補買戒指？他瞪大眼說：「我當佢講真㗎，真係唔要呀。」問到家英哥是否贊成日後改稱阿姐作羅太？他甜笑說：「你哋咪埋去叫囉，我當唔知，我哋冇秘密結婚，佢重係我女友。」再問家英哥現時如何稱呼阿姐，他說：「都係阿姐囉，我叫佢Lisa。」不過阿姐被稱呼羅太時，即拒絕道：「唔好啩，都未結婚。」
家英哥又透露到達日本的頭幾天身體情況良好，其後漸感疲累，問家英哥在日本有否亂吃東西時，走在阿姐身後的他細聲道：「有呀，我食咗雞泡魚，阿姐知知哋啦，佢同我話命係你嘅，你諗清楚先好食，我哋大班朋友去，分枱食都俾佢昅到。」阿姐此行是否細心照顧他？家英哥說：「我照顧佢就真，佢跳拉丁舞扭親，成日要我拖住佢。」
採訪：李珮洳、比華利、馮美茵
攝影：李珮洳、娛樂突發組
