中記喺九龍塘根德道，租咗幢三層高大屋做分行，都算別開生面，嗰區啲屋，租嚟做老人院、幼稚園或者婚紗舖好普遍，全幢做代理行就比較少見。
除咗地理環境造就呢間巨舖出現之外，相信中記亦為附近嘅歌和老街新盤做足準備，呢個盤有二百幾個分層同十幾間獨立屋，其中獨立屋係區內多年嚟唯一新供應，難怪中記咁着緊。
根德道大屋四千幾呎，三層樓面都用作寫字樓，原裝廚房拆咗做貯物房，但全屋五個浴室，就一個都無拆到，聽講重用得㖭，管理層所以保留咁多浴室，係有實際需要，因為呢間巨舖開業初期，已經有三十個員工，短期內會增加至六十人，少個廁所都唔掂。間屋月租要六位數字，租期四年。
樓市旺，成交多，代理近排做生意做到手軟，最近成日都話要增聘人手。中記噚日又有新舖開張，九龍區董事劉瑛琳話，𠵱家九龍住宅部，有九十一組銷售隊伍，前線營業員七百五十人，不過重未夠，喺七月一號之前，會繼續擴展，目標係加到一百一十組，再請多一百人。
代理界一時間吸納咁多新血，難免良莠不齊，一姐劉瑛琳話，近期有唔少目光較為短淺，希望好快趣有豐厚收入嘅新人加入，佢覺得，新人應該要有抱負、有承擔。
太古一個月前，以雙倍佣金，促銷中半山雅賓利，由一巴仙加到兩巴仙，以四千萬樓價計，做成一單，就有八十萬佣，代理自然落力。
呢招高佣促銷果然有效，加佣之前，一個月都賣唔到一個，去貨咁慢，主要係太古唔急，其次係銀碼大，動輒三、四千萬。今次太古態度轉為積極，甚至高佣促銷，短短一個月，就賣出六伙，呎價重創萬七新高，套現二億。
既然呢招咁掂，太古決定延長至月底，希望快手賣埋最後三間，完成呢個拆售咗好幾年嘅豪宅盤。
二手活躍，作為業主要賣樓，自不然想賣貴啲。
祥益過去一個月，做咗個網上投票，睇吓有幾多放盤業主有意加價，結果發現，投票嘅三百二十人之中，六成話會加價，選擇封盤就有兩成四。至於加價幅度，最多人加五至十巴仙。
四百零一人中，八成話會增購物業作投資工具，短炒佔三成。
電郵地址：[email protected]
