世事難料，當年香港新機場開幕大混亂成為國際笑話，今時今日就屢獲殊榮，成日獲選為世界第一。好似航空評審機構Skytrax搞嘅旅客調查，香港國際機場以超過十三萬票，連續第五年成為全世界最好嘅機場，勁敵新加坡樟宜機場就以唔夠五百票嘅差距，輸個馬鼻做阿二。首爾仁川機場就排第三。
Skytrax話，最多人讚香港機場夠闊落、光猛、空氣流通、乾淨、有效率同埋交通接駁良好；新加坡機場就勝在設施多籮籮，連泳池、免費電影乜都有，好啱做轉機樞紐咁話。
另外，國泰為慶祝成立六十周年，計劃明年喺國泰城開設一個永久性歷史展覽館，畀市民了解航空業嘅演變。國泰美食出晒名，佢哋本刊物《國泰天地》話，國際動作片巨星尚格雲頓二月由香港坐飛機去曼谷，食完一客鱸魚配飯猛話好味道，要多一客，可見飛機餐都有市場，其他對手要學吓啦！
傳真︰2623-9278
電郵︰[email protected]