被喻為全球最矚目嘅康城影展，下月十一號喺法國揭幕。雖然影展入圍名單重未公布，但係權威電影雜誌《ScreenDaily》噚日率先披露有機會角逐大獎嘅電影，雜誌話由關錦鵬執導嘅《長恨歌》同杜琪峯執導嘅《黑社會》都好有機會入圍。至於由李英愛主演嘅《親切的金子》，入圍呼聲極高，但一切就要睇套戲可唔可以準時完工。
近年東亞電影喺國際多個影展成績唔錯，所以《ScreenDaily》噚日公布嘅初步入圍五十幾部電影之中，就有十部係嚟自東亞。不過最終大會只會揀十幾部電影角逐金棕櫚獎，競爭都咪話唔激烈。
本雜誌除咗睇好《長恨歌》同《黑社會》之外，亦預計由張藝謀執導、高倉健主演嘅《千里走單騎》、內地導演張元嘅《看上去很美》同埋台灣導演侯孝賢搵舒淇演出嘅《最好的時光》，都可以入圍。
韓國電影方面，雜誌預測導演金基德同鄭在恩執導嘅新片都有機會，之但係今年最矚目嘅韓國電影，非李英愛主演嘅《親切的金子》莫屬，可惜導演朴贊郁直至上星期仍然趕拍緊套戲。如果佢入選嘅話，希望就唔好學似上年王家衞套《2046》咁，要到開畫前一刻先送菲林啦！
台灣組合S.H.E成員Hebe俾台灣傳媒影到同一名男性化打扮嘅幕後製作人阿Bon鬼咁親熱，阿Bon嗰時喺度搞Hebe背脊嘅胸圍釦。S.H.E噚日喺台灣出席食品記者會，Ella同Selina就力撐Hebe鍾意男人。Hebe話：「報道全都離譜，甚麼拉內衣親密動作，其實那天我根本沒穿內衣。」
近日有人冒充《戀之風景》女導演黎妙雪個名，電話性騷擾Sam'sAngels成員，甚至冒充星皓電影公司要員，向演藝學院幾位女學生問埋啲性問題，想呃佢哋試鏡。黎妙雪噚日話好在冇女仔受騙，目前佢重聯絡緊班演藝學生，一齊報警求助。
黎明早前捧咗個叫Janice嘅女歌手，幾個月嚟都只係聽到佢嘅歌，就未見佢過樣，搞到人哋以為佢個樣麻麻哋。噚日馮仁昭經過尖沙嘴巴士站，終於見到Janice嘅廣告牌，原來佢叫做衞蘭，聽聞佢下星期三重會開一個迷你音樂會同大家見面㖭。
《大長今》演員陸續殺到，首先今日到埗嘅係韓尚宮梁美京，而跟住輪到閔政浩池珍熙、小長今趙貞恩、崔尚宮甄美莉同皇上任豪；原來今個月十七號小長今嚟香港嗰日，鄭尚宮呂韻季都會嚟香港，鄭尚宮演技精湛，馮仁昭聽到呢個消息都好興奮。
