早排大陸地產股，尤其係上海地產股，因為阿爺話要遏止炒風增設稅項，跟住又呢樣又嗰樣，結果搞到全線下跌。
不過，跌完一輪後，有部份開始有回升迹象，例如上海復地（2337）公布完靚仔業績後，大摩立即出嚟力推，股價由低位回升，由2.05元水平升至噚日的2.375元。
至於同屬上海幫的上海置業（1207），將於下周五公布全年業績，江湖傳聞業績一樣靚靚，可以考慮一下。
上海置業早排股價最高炒過上去1.34元，但之後急速回落，公司原本在今個星期出業績，但就延遲至下周五才公布，一度嚇親唔少街坊，但經紀黃話聽唔到有壞消息，只係公司在派息方面未講掂數而已。
上海置業去年曾經發行過一批可換股債券，換股價1.116元。對公司而言，人哋換股當然好過公司用錢贖回，呢個可能亦係上海置業股價炒高的誘因。
上海置業昨日冇起跌，收0.98元，成交股數582萬股，金額569萬元。
慕容小初