之前樸茨茅夫班主文達歷吹水，話呢兩日會公布球隊由史特根執教，點知文達歷竟然死性不改，搵番個外國人佩連（法國籍）嚟執教；雖然話前熱刺領隊柏列特將會協助佩連喺英超聯盡快取得適應，但喺呢個季尾護級階段，搵個全無英格蘭足球經驗兼英語未知掂唔掂嘅人返嚟掌帥印，真係唔敢睇好。
更奇嘅係，𠵱家樸茨茅夫陣中法國球員都唔多個，佩連同隊員嘅溝通睇嚟會有好大問題。此外，佩連由於同前度球會馬賽嘅合約糾紛重未完，上季被炒嘅佩連，希望馬賽賠番提前終止合約費；但馬賽重精，據講為咗慳番呢筆錢，已經入稟控告佩連喺執教該隊時，性騷擾該隊女職員，重搵嚟幾位球員做證人，玩下手佩連可能要調番轉賠幾百萬歐元畀馬賽㖭！唉！老樸呢次真係騰騰震……。
莫拉堤冇眼光燶面
前晚國際米蘭輸波，喺看台上睇波嘅班主莫拉堤當然燶面。估佢燶面原因，唔單止係隊波踢得唔錯都輸，重有係睇住當年棄將派路包辦兩個助攻、史譚頂入一球。話說國米舊年唔肯出高價，至令史譚投向AC米蘭懷抱。事實證明國米高層無眼光，今次唔止輸波，重輸埋面囉。
紐記「橫財」撥歸青訓
壞孩子保耶同隊友戴亞喺比賽中講手單嘢都講咗好幾日，保耶將被球會重罰差唔多成三百萬港元人工，不過紐卡素會方並未諗住將呢筆「意外之財」中飽私囊，而係用喺青訓計劃。我求大俠覺得呢個決定真係做得幾好，保耶都叫做有份為青訓計劃出番一分力，叫做「贖罪」啦。
祖連奴返家鄉搵食
巴西中場祖連奴喺星期二先俾蘇超聯球隊些路迪解約，不過話咁快喺星期三巴西球隊彭美拉斯已經召開記者會公布簽咗佢，重話預期祖連奴喺快將開鑼嘅巴西聯賽會成為球隊重要一員。些路迪見祖連奴喺球隊唔啱踢，做個順水人情同佢解約等佢可以加盟彭美拉斯，都算唔話得。
喀麥隆沉冤得雪
喀麥隆國家隊年前因為穿着贊助商為其炮製嘅無袖及一件頭款式球衣，結果國際足協「老懵懂」白禮達睇唔過眼，嚴禁該隊穿着兼喺佢哋世盃外圍賽進行減分處罰。但日前德國有仲裁機關作出判決，認為國際足協無權咁做！先例一開，其他牌子唔知會唔會又有新花款波衫出籠呢？