曾經因為演出電影《記得香蕉成熟時》而受到張國榮賞識嘅鄧一君，一直對電影工作充滿熱誠，佢亦曾經試過搵政府資助，拍咗部《窗內閃爍的音符》嘅短片，重搵咗佢老友古天樂做男主角，一做導演嘅滋味。
鄧一君原本想乘勝追擊，乘機開番部商業片，可惜一直搵唔到投資者，後來佢就返番無綫拍劇，可惜亦得唔到無綫重用，呢幾年實在冇乜機會發展，鄧一君不得不向現實低頭，最近終於轉行去做保險經紀。
馮仁昭噚日收到鄧一君電話，先知佢轉咗行，佢話：「我以前性格好內向，做嘢又唔算好積極，所以我經過深思熟慮後，決定要改變自己嘅性格，因為性格可以改變命運，而保險呢行就係成日要接觸人，對我嚟講係一個新體驗，呢份工除咗要搵人買保險，重要兼顧埋理財策劃，幫人去投資，我返咗新工冇耐，都做得幾開心。」
田蕊妮早排接受《Him》雜誌訪問，提到佢同準老公杜汶澤喺六月舉行嘅婚禮，田蕊妮話：「我呢一生人入面，只會擺一次結婚酒，唔會太浪漫，不過就會請晒班親友作個交代。我同阿澤都會請圈中嘅朋友，但就怕啲親戚見到明星，現場引起混亂令朋友尷尬。」佢又話結咗婚後唔會從此息影做少奶奶，田蕊妮話：「我已經簽咗間新公司，佢哋安排咗好多新工作畀我。」
吳日言噚日到商台接受《是日本人鄭家輝》節目訪問，佢將會喺下個月音樂會入面扮中森明菜，所以近日佢正積極搜集中森明菜嘅資料，其間佢卻發現當年中森明菜一輯全裸照，吳日言話：「佢張相係有男模特兒遮住重要部位，我覺得影得好靚，自己都想影一張放喺唱片封套入面。」
韓劇《大長今》喺香港非常受歡迎，連帶劇中所有演員人氣都急升，聽日飾演韓尚宮嘅梁美京就會嚟香港喺奧海城出席活動，重會喺現場傳授整泡菜秘技，佢今次嚟香港，唔單止吸引本地傳媒同長今fans，就連馬來西亞、新加坡嘅fans都話會組團一睹韓尚宮嘅風采，呢套劇嘅魅力真係厲害。
王菲同未婚夫李亞鵬呢個月結婚，近排一直盛傳王菲婚後會淡出樂壇，佢同李亞鵬近日又喺上海合作經營一間名為「維派」嘅酒吧，近排酒吧裝修完成，重請咗大約一百名男女員工，並開始培訓佢哋，準備稍後開始營業。
