在土共一片反曾謾罵叫囂聲中，商界繼續向當奴「雪中送炭」！繼誠哥之後，九倉主席吳光正亦跟住表態，聲稱無論邊個做特首，最緊要係唔將私人恩怨帶到公職上！
土共就係出於私人恩怨瘋狂反曾！以北角騎呢版蔡菜子為總代言人，直頭同當奴秋後算帳，話佢要好好「反思」四十年來緊跟「港英」嘅所作所為，言下之意，即是警告埋當奴細佬曾蔭培，一九六七年在前殖民地警隊，為捍衞社會繁榮穩定，堅決執行鎮壓土共嘅暴動，亦要因住嚟！
土共惡言惡相，梗係唔係為咗「愛國」，而係準備向當奴伸手要官職、要資源、要錢要權，開出至少教育統籌局局長一個高職，點名要由曾鈺成來坐，至於其他工聯會等所謂職業培訓等等種種撥款，雖然廢董七年，一早經已鬆章過水，亦嫌唔夠，當奴上台，一定要追加！
土共在左邊喊打喊殺，泛民主派啲大狀律師又嗌反釋法，係咁左右夾攻！當奴就算苦口苦面咁解畫，主張早日釋法，土共都唔滿意，亦唔領情喎！民建聯哨牙劉就追擊當奴，話既然釋法合情合理，點解當奴解畫解得咁痛苦？
當奴未上台，已淪為弱勢特首！甚至連泛民主派鬧當奴鬧得斯文少少，土共都即時拍枱，話嗱嗱嗱，啲泛民主派錫住你嚟鬧，重唔係同你當奴做苦肉計，裏應外合？
咁即是話：土共將會同泛民主派一齊反曾，土共講一句粗口，民主派就一定要講足三句；土共問候當奴令壽堂，咁民主派就一定要辱及當奴十代祖宗，齊齊鬥大聲，先至夠熱鬧！北角呂秀蓮罵街事件，雖已告一段落，正如八方所料，蔡菜子反曾，搞到曾爵士民望更增，民建聯即時一嘢推開蔡婆，扮懵扮儍，蔡菜子做咗炮灰，在立法會死死氣叫當奴「多謝」佢㖭！
呢啲就係共黨邏輯：佢摑你一巴，你應該多謝佢，因為佢激勵緊你發奮做人；向你塊面吐篤口水，係協助你磨練忍功。猶太人更加要多謝希特拉，幾乎將佢哋滅族，結果先至激勵到幾多猶太人發揮潛質，做生意發晒達㖭！蔡菜子真係當奴嘅大恩人，當奴坐正之後，唔畀蔡婆做番個政務司司長，喺北角建多兩座兒童遊樂場，咪好忘恩負義？
傳真︰2623-9278
電郵︰[email protected]