萬眾期待嘅尖沙嘴豪宅凱旋門，發展商終於揭開示範單位面紗，噚日開放喺國際金融中心成五萬呎嘅展銷廳，讓傳媒一睹樓盤嘅豪氣。
呢個耗資兩億興建嘅展銷廳，有七個示範單位之外，重模擬興建喺五百呎高空會所設施，好似水療設施同二十五米長臨海泳池。
幾個示範單位由一房到四房都有，五百幾呎到三千四百幾呎，用唔同寶石做設計主題，包裝力求華貴。
至於成個樓盤只得五個嘅天際獨立屋，重搭建出隨樓附送嘅私人泳池，成個九龍站上蓋樓盤，未見有同類供應。
凱旋門外形夠矚目外，重打破唔少物業規範，例如建於高空嘅住客會所，就未有樓盤試過。新地喺展銷廳內模擬一部直達高空嘅電梯，參觀人士乘坐呢部𨋢，重感受到離心力，同搭真電梯一樣，幾可亂真。
歌星蕭正楠年頭連買兩件元朗悅富豪苑，短短個零月，就執四十萬，重好搵過正職。
首次投資就有佳績，加上有本錢在手，難怪佢心雄。中記龍智烽話，蕭正楠再度入市，以八百七十萬，買入加州花園銀主盤，二千呎，每呎四千三百幾，銀碼比上次大咗，而且要四度追價先至買到。
聽講，個盤一推出，即時吸引五、六個買家爭相出價，包括眼光獨到嘅蕭正楠。結果由佢勝出，表現勇進，打低所有對手，成功買入心頭好。成交價雖然比叫價八百萬高出近一成，不過佢話物有所值，預期一兩年可以升到六千蚊呎㖭。
地鐵九龍灣德福廣場開業二十年以嚟，一直都係東九龍人流最多嘅大型商場，不過，上月登場嘅觀塘創紀之城apm商場，規模唔輸蝕之餘，又以營業至凌晨為噱頭，預計係德福嘅勁敵。
不過，地鐵商場事務經理陳嘉明就唔係咁諗，佢認為，東九龍多一個具規模嘅商場，只會帶嚟更多人流，apm開業至今，德福廣場人流及生意額都冇受影響。
佢話，客源重叠在所難免，只要做好個場，就唔怕競爭。好似佢哋未來一年，就破天荒請得歌星梁詠琪做代言人，希望藉着佢嘅知名度，吸引更多人流，從而提高生意額。
另外，佢透露，青衣城商場，會配合迪士尼搞啲推廣，但暫未有任何合作計劃。
中記生意好，後勤有花紅獎金分，澳門分行一樣掂，三月營業額四百六十七萬，每個後勤攞八百蚊利是，相對於月薪幾可觀。
中原澳門執董郭朝隆話，上月促成一百七十二宗成交，買賣佔一百五十六宗，其餘係租務。
另外，為咗配合近排個市，全個中記集團今個月有一系列新廣告出街，以「家添原動力」做主題，就經濟、樓市、教育與公眾等幾方面，深化集團形象。
電郵地址：[email protected]
