關心妍（Jade）日前為新歌《挪亞方舟》拍MV，由於當日天氣寒冷，阿Jade休息時即走向工作人員堆取暖，但眾人卻捉弄她，見阿Jade一過走來即避開，如在玩「麻鷹捉雞仔」，玩到一身汗。
關心妍（Jade）為福音電影《挪亞方舟》唱同名主題曲，日前她在郊外和海邊拍攝該曲MV，導演更請來一隊管弦樂團作現場伴奏。阿Jade說：「其實我唱《挪亞方舟》呢首歌曲時特別感動，因為佢嘅歌詞同我以往唱嘅慘情歌好唔同，首歌歌詞好有意思，聽落去會愈嚟愈感動。」
阿Jade當日只穿了一套連身短裙拍攝，但由於天氣非常寒冷，阿Jade未埋位時便躲在人群當中，但工作人員卻捉弄她，她去東大家就跑去西，彷彿在玩「麻鷹捉雞仔」。
跑了十五分鐘後，阿Jade已不需要找人取暖，因為她已跑到全身汗。阿Jade扁嘴說道：「我俾佢哋蝦呀，佢哋見到人哋冷到牙關打震都唔理，真係好慘。但我好開心，好耐冇玩過『麻鷹捉雞仔』咯，有啲返番細路仔時嘅感覺。」
阿Jade透露近日積極健身練氣，因為她將會籌備最新大碟，現已進入選歌階段。阿Jade說：「今次我會花多啲時間籌備新碟，希望做到盡善盡美。所以我積極鍛煉身體，希望喺運氣上再花啲工夫，到時唱起嚟可以更加發揮自如。我重特別請咗位健身教練幫我，希望到時入到錄音室有新突破。」
