工業股偉易達（303）早前公布截至去年9月中期業績，因為電訊產品業務差，盈利比去年同期倒退51％，叫人意外，令唔少芬佬傷心沽貨，兼夾被分析員調降盈利預測。
不過，有分析員見過偉易達管理層後，最近開始有人轉軚睇好偉易達。據講公司已將曾經管理失誤的電訊業務重組，重新踏入正軌，下半年將會有錢賺。美國市場雖然停滯不前，但佢哋嘅電話喺歐洲就愈賣愈好。
另外，偉易達喺電子學習產品方面，由於所推出的新產品熱賣，估計將成為05年盈利增長的動力。如無意外，偉易達將於6月公布全年業績，屆時或者會有多少驚喜畀大家。偉易達大股東早排曾多番增持，照計跟佢買都博得過。
偉易達昨日升2.21％，收11.55元，成交股數51萬股，金額593萬元。
另外，經紀黃早排推介的中國生物製藥（1177），近日股價勁升，噚日又升12.73％，收3.10元。經紀黃話，一早講過隻股街貨唔多，容易砌上，但去到呢個水平，已經超過晒所有分析員的目標價，睇嚟可以考慮獲利。
慕容小初