老董下台、人大釋法，香港地新聞多多，唔少記者行家都好努力咁為讀者作出專業嘅報道。報業公會噚日舉行「2004香港最佳新聞獎頒獎禮」，《蘋果日報》奪得其中六個獎項，包括報道藝人黃霑逝世嘅《香港送別一代鬼才》，勇奪最佳新聞報道組冠軍。南亞海嘯觸動全球，《蘋果》嘅《驚世大海嘯》系列報道則奪得最佳新聞報道組季軍。最佳新聞寫作方面，我哋嘅將軍澳工業邨才子蔡元貴憑一篇《中國人光榮 2008北京再見》獲優異獎。
新聞圖片方面，突發組同事李偉民一幅「沖天大火」得到新聞組亞軍，羅日昇喺一場火災過後影咗幅主題為「患難見真情」嘅作品得到優異獎。美術組同事張志彬憑黃霑病逝嘅版面設計，得到新聞版面設計亞軍。
出席頒獎禮嘅署理特首煲呔曾讚揚香港傳媒有好高嘅國際地位，喺不久之前有關海嘯嘅報道更係唔比其他國際權威傳媒遜色。八方喺度再次恭賀所有得獎嘅行家！
傳真︰2623-9278
電郵︰[email protected]
