萬子老婆監場防出軌
李思蓓：證明我有吸引力

李思蓓近月來緣繫中年發福的圈中人，繼與王晶傳緋聞後，有報道指她拍攝亞視劇集期間，同劇拍檔萬梓良（萬子）對她甚冧，令萬太要偕子到錄影廠監場，李思蓓坦承萬子很照顧她，更笑言：「證明我有吸引力！」

擁有34D、23、33魔鬼身材的李思蓓最近在拍攝中的亞視劇集《美麗傳說2之星願》內，與飾富豪的萬梓良組情侶檔，但早前有報道指萬子極冧她，嚇得萬子太太帶同兒子到錄影廠監場。

「成日一齊食飯」
不過，李思蓓前日接受本報電話訪問時笑說：「證明我有吸引力啫！講笑咋，咁犀利？唔會啦，佢唔係冧我，佢帶老婆同個仔嚟探班啫，大家拍呢套劇合作得好開心，萬子好照顧人，對同劇嘅男男女女都好照顧。」
未知萬子如何照顧李思蓓？她說：「佢有教我做戲，好提點，我哋一齊拍劇，成日都有一齊食飯。我覺得萬子係一個好爸爸，佢好照顧小朋友，佢喺片場成日捉住個仔攬攬錫錫嘅。」
李思蓓自言絕不與有婦之夫發生感情，她說：「一定唔會，有女朋友都唔會呀，我會好抗拒，一個男仔有女朋友可以追你，佢做咗你男朋友，第日一樣可以追第二個。」
李思蓓拍攝《美》劇期間與萬子朝夕相對，既然她表示與對方絕無可能發展，自稱愛情空白多時的她又會否羨慕對方有幸福家庭？李思蓓說：「我年紀尚輕，二十幾歲啫，大把時間，睇緣份啦，我有冇男朋友都得，冇未必唔開心，有嘅都可以好煩。」

「王晶只係老闆」
李思蓓被指為王晶新女，對於與王晶的緋聞，她說：「冇乜所謂，新聞嚟啫，人哋點寫你都得，做呢行有新聞總好過冇，王晶只係我老闆，重係一個幾嚴肅嘅老闆。」
採訪：朱倬誼
攝影：陳慧安
化妝、髮型：KathyLam@HanaStudio
服裝：Morgan