【本報訊】盛傳有意參選特首的九龍倉集團主席吳光正，昨日藉機「勁寸」長實集團主席李嘉誠的「商人不應治港論」。吳光正指不論利益關係是千絲萬縷、一絲一縷還是無絲無縷，一個以權謀私、公私不分、利用職權打擊他人的人，不論是商人、專業人士、公務員或草根階層，都不適合做特首。學者指兩大地產商公開針鋒相對，反映地產商矛盾加深，若北京不妥善平衡各方利益，日後特區管治將面對更大問題。 記者：莊曉陽、羅偉光
不忌諱對政治問題發表意見的吳光正，昨日先在報章撰文支持釋法，再藉旗下有線新聞播放十萬小時慶祝儀式的機會開腔，昨午更有九倉人員特別通知傳媒到場採訪，精心部署反擊李嘉誠。李嘉誠上月公開支持署理特首曾蔭權接任特首，更開列出任特首條件，表明商人不應該做特首，「因為有千絲萬縷關係……即使我有資格、我願意做特首，將生意交畀佢哋做，無論我幾公道，都仍然有隱藏嘅影響力。」李嘉誠的言論，被政商界視為針對吳光正，因為他說唐英年家族只涉足紡織業，不算有千絲萬縷關係。
昨日儀式由曾蔭權任主禮嘉賓，吳光正在儀式前接受記者訪問，回答了十多條問題，回答得最詳盡的是反駁「商人不應治港論」，以下是記者提問、吳光正回答的部份摘要。
問：新嘅特首應唔應該係商界出身？有人話商人因為有千絲萬縷關係，唔啱做特首，你有咩睇法？
答：我諗，廣大市民都咁睇法，千絲萬縷又好，一絲一縷又好，或無絲無縷又好，最緊要係一個唔可以以權謀私啦、公私不分啦、同埋唔可以將私人恩怨帶到公職度，嚟益自己友或打擊他人，我諗香港人一定唔會支持。所以唔理商界又好、專業人士又好、公務員系統裏面嘅人又好、草根階層嘅人又好，任何方面嘅人，呢幾個基本條件，如果唔符合嘅，相信香港人眼睛係雪亮嘅，不過呢啲都係老生常談。
問：參選特首要咩條件？
答：任何出嚟參選，攞到一百票（選委會提名）都係好大嘅條件。
問：但點樣消除公眾嘅感覺，來自商界嘅人（做特首）會有隱藏嘅利益？
答：香港人我諗係好精明嘅，眼睛係好雪亮嘅，你呃唔到人嘅。
問：你會唔會有啲介意呢句說話，同埋呢句說話會唔會影響你未來選唔選？
答：我一早講，我諗講咗八年，一直都話唔參選啦，呢個唔係新聞啩？
問：你會唔會支持田北俊參選？
答：我唔知道田先生會出嚟選，佢又無叫我支持佢選，我哋唔好講如果嘞。
問：你係咪認為有選舉比自動當選好？
答：喺呢方面，任何一個有心人決定參選都好，都要睇大局，都要衡量係咪有足夠票數，譬如話，一個有心人知道已經有另一個眾望所歸嘅人選，佢或者會選擇唔去參選，反過嚟支持對方，呢啲係佢嘅自由，我哋應該尊重佢選擇唔參選嘅自由，至於好定唔好，畀歷史去判斷。
問：如果曾蔭權參選，你支持佢嗎？
答：我諗喺三月初我已發表過聲明支持佢，呢啲已經唔係新聞。
問：怕唔怕曾先生因為同誠哥關係好會偏私？
答：我諗曾先生喺政府工作咁多年，若佢做特首，佢一定可以做到不偏不倚，因為呢個係香港人嘅要求。
問：你覺唔覺前排誠哥，李嘉誠先生嘅言論係針對你，話商界人士唔適合參選？
答：頭先問過嘞，第一，我唔會揣測任何人嘅說話，第二，我講咗八年，都無話要參選，第三關於選舉方法，各方面嘅要求要不偏不倚。
問：有關發言會唔會令商界有能者嘅人士卻步？
答：我諗唔會，當事人若認為自己有足夠支持票去參選，而佢有呢個意向，呢個係佢嘅選擇，我哋要尊重佢。但當佢見到如果有一個眾望所歸嘅人士，可能佢以為我都可以支持佢，呢方面應該等佢自己決定。
吳光正約於昨晚六時半接受訪問，其辦公室於一小時後即發出其答問摘錄，不過記者提及「誠哥」的部份，均被改為「其他商人」，而曾蔭權於儀式後即離去，沒有回答記者問題。
中文大學政治與行政學系高級導師蔡子強指，由於李嘉誠言論容易令人聯想針對吳光正，吳可能對此不忿故高調反駁，他又指兩大華資富豪針鋒相對，顯示董建華任內被指官商勾結並非小市民「幻覺」，「過去八年有地產商覺得利益受損，商人之間矛盾加劇，如果北京唔能夠擺平各方利益，曾蔭權第日管治都會面對好大困難。」
