住家菜：<br>放工煮三椒有營菜十分鐘有得食

住家菜：
放工煮三椒有營菜十分鐘有得食

現代職業女性不易為，要上班又要做家務。作為OL的麥太，每晚煮的餸菜都要具備快捷、好味又要有營養的原則。今日我們直擊麥太放工後，喺一小時三十五分鐘內，由買餸到煮好飯的實況。

記者：陳冰麗　
攝影：黃子偉　
示範：港島區讀者麥太

■六點半開始炒餸！

■七點開得飯啦！

三色燈籠椒望生活多色彩

結婚逾十二年的麥太，現有一個八歲半的女兒。自從囡囡上學後，麥太希望每天都可以在晚上七時，一家人準時食飯，而囡囡就可以喺九時上床睡覺。為此，麥太每天下班後，就要即刻去街市買餸。

■麥太婚後首次下廚就以三色燈籠椒作材料，希望日後生活像三色椒般充滿色彩。

兩餸方便易做

要她推薦兩款簡易菜，她首選三色椒炒牛肉和節瓜炒鯪魚肉，兩個餸背後原來都有特別意義。前者是麥太婚後第一次下廚煮給老公吃的餸菜，而後者則是囡囡的至愛。「選擇節瓜是易入口又夠正氣，鯪魚肉無骨唔怕鯁親。」麥太稱：「兩個餸所用的材料如燈籠椒、番茄、西芹均容易清洗，烹調時間平均十多分鐘就搞掂，相當快捷！」

三色椒炒牛肉

第一道煮畀老公食嘅餸，Sweet！Sweet！

自製價：$28/3-4人份量

用咩料：
紅、黃、綠燈籠椒 各1個
已切牛柳邊　 6両
西芹　 2両
已焗熟松子仁　 少許

調味料：
豉油、糖、油　 各少許
薑汁　 1茶匙
生粉　 1/2茶匙

12分鐘搞掂

1.牛柳邊加調味料拌勻，以少許油略炒至半熟，待用。三色燈籠椒洗淨，切細件。

2.西芹洗淨，切段，放入淡鹽水內烚至半軟（約3分鐘），瀝乾水，待用。

3.燒熱少許油，放入三色椒炒約3分鐘，加入西芹再略炒2分鐘，以鹽、糖調味。

4.放入牛柳邊拌炒約2分鐘可上碟，撒上松子仁即成。

小貼士：
1.牛柳加入薑汁調味有助辟腥，更有鬆肉作用。

2.牛柳加入少許油調味，可令肉質變得較滑，但不能加鹽，否則肉會韌口。

3.西芹先以淡鹽水烚過，可縮短炒的時間。

4.即食已焗熟的松子仁，可於大型雜貨舖有售。

囡囡至愛：節瓜炒鯪魚肉

自製價：$19/3-4人份量

用咩料：
節瓜　 3個
細番茄　 2個
已調味鯪魚肉　 1/2斤
薑片　 少許

■食極唔厭！

14分鐘煮好

1.以少許油將鯪魚肉煎成薄餅，反轉煎至兩面金黃色，取出切條，備用。番茄洗淨，切細粒備用。

2.節瓜㓟去皮，切細件。爆香薑片，加入節瓜炒約7分鐘，加少許鹽、糖調味。

3.放回鯪魚肉拌炒，最後加入番茄粒略炒2分鐘即可上碟。

小貼士：
1.加薑片炒節瓜，可減低寒涼感。

2.番茄粒最後落，可避免炒得耐而煮至溶，失去口感。

跟住嚟學嘢：

靚節瓜又瘦又長

呢個時候屬瓜類的當造期，麥太話揀節瓜千祈唔好貪大個，瓜形瘦長的反而更好，因為瓜囊較少，肉較多。

炒肉揀牛柳邊

麥太教路，用作炒的肉，建議選用牛柳邊，肉質會較腍滑。另外，可叫檔主代切，慳番啲時間，檔主亦切得夠薄。

燈籠椒要有光澤

已包裝好的三色燈籠椒，要知靚唔靚，可以睇其表面。麥太話，有光澤、表皮無爛、㩒落實淨就買得過。