個市想上想上，恒指跌過24點之後，資金落行，埋單反升40點，收13602，距離全日高位只係相差17點。銀行加息嘅影響，已漸消化，地產股短期有運行。
新地C輪4643：新地（016）全日高低相差0.50元，平收70.75元。昨日推介嘅C輪4643，全日波幅16%，收24.3仙，跌5%。熱門貨色中，跌得最多嘅就係4643，最博得過。
4643喺6月初夠鐘，溢價2.4%，槓桿率29.1倍（有效17.4倍），引伸波幅17.2%。同類輪3797收24.3仙，跌2%，壽命長過4643約7個禮拜，槓桿率相同，但溢價高出接近3個百分點。4643拍埋3797，贏晒。
長實C輪3560：長實（001）收70.50元，升0.25元。熱門C輪中，3560冇跟正股升反而下跌，收14仙，唔見8%，跌得最多嘅熱門輪係呢隻，又係博得過。
3560喺6月中到期，溢價4.1%，槓桿率50.4倍（有效18倍），引伸波幅20.4%。隻輪爆炸力同殺傷力都好勁，炒賣記住食得鹹魚抵得渴。
太AC輪3509：太A（019）收62.25元，升1元，C輪3509收31仙，升2.5仙，未跟得貼，有得諗。
3509喺9月尾夠鐘，溢價4.6%，槓桿率20.1倍（有效10倍），引伸波幅20.3%。另1隻太AC輪3528，禮拜一推介過，數據稍遜於3509，但交投則旺啲。
華能C輪3940：華能（902）除息收5.75元，實升3.6仙。C輪3940彈升28%，成交金額超過兩球，9月尾夠鐘，溢價13.9%太高，貪唔過。
章盛