許冠傑（Sam）去年一手栽培的Sam'sAngels十多名成員，近日疑被人電話性騷擾及行騙，該名不法之徒假冒電影《戀之風景》女導演黎妙雪的名義，訛稱會開拍一齣以性為題材的電影，致電Sam'sAngels成員查問她們的性生活。黎妙雪獲悉此事後大為震怒，準備聯同一班懷疑受性騷擾的Sam'sAngels成員報案求助。
去年復出舉行四十多場個唱的許冠傑，為培育新人而成立了一隊名為Sam'sAngels的女子組合，成員包括Adorabelle、Nikita、Jennifer、Sukie、Crystal、Christy、Cash、Kiki和Bibi等十多人，眾人除參與阿Sam在紅館舉行的個唱演出外，連阿Sam早前到吉隆坡開騷，部份Angels亦有同行。
借搜集資料探私隱
本報近日接獲消息，指有人假借曾執導鄭伊健和林嘉欣主演電影《戀之風景》的女導演黎妙雪名義，致電向這班Angels作性騷擾，該歹徒表示即將開拍一齣以年輕人性生活為題材的電影，自稱為搜集資料，對Angels提出有關性生活的問題，又謂正在物色新片女主角，力邀一班Angels試鏡。
記者昨日向黎妙雪了解此事時，她在電話中說：「早排有個音樂人打電話畀我，話有人打電話同佢講，嚟緊我會同黃真真開部新戲，要搵佢做音樂，但根本冇咁嘅事。」
黎妙雪續說：「隔咗冇幾耐，又有人用《戀之風景》阿妙呢個名打電話畀JamCast（模特兒及經理人公司）旗下模特兒，亦即係Sam'sAngels部份成員，話要開一部講年輕人性生活嘅新戲，希望同佢哋探討吓年輕人對性嘅睇法，問咗佢哋一啲好深入嘅性問題，又話部戲好似《SexandtheCity》咁，要搵四個女主角，邀請佢哋試鏡。
再向演藝學生埋手
「後來JamCast公司一位負責人Miranda打電話問我，先至揭發呢件事。而今日有人直情用黎妙雪個名，打電話向演藝學院一班兼職模特兒嘅學生埋手，由於我只係構思緊開拍一部恐怖片，完全冇開性題材電影嘅打算，我擔心會有女仔受騙，所以準備搵埋班Angels一齊報警求助，提醒大家千祈唔好上當。」
而Sam'sAngels經理人兼JamCast發言人Miranda昨日則回應說：「Sam'sAngels裏面有十一個女仔都係我哋旗下model，佢哋分別接到一把女聲同唔男唔女聲嘅電話，對方自稱係《戀之風景》嘅阿妙，問班女仔一啲好私人嘅問題，又問佢哋有冇興趣嚟試鏡。」
心存疑竇拒絕見面
Miranda表示幸好眾Angels夠醒目，覺得電話內容有問題，所以大多數都沒有回答問題，亦不肯答應應約試鏡。
採訪：戴彩煥
