美國女歌手瑪麗嘉兒（MariahCarey）自從由九十年代入行以嚟，一直行性感路線，袒胸露乳當食飯。不過唔少人發覺佢個胸近年愈變愈大，一個專門揭發人整容嘅網站又將瑪麗嘅陳年舊相同佢今時今日嘅相嚟比較，力證佢曾經做過隆胸手術。
其實瑪麗嘉兒喺幾年前，周不時俾美國小報話佢抽脂、拉面皮同隆胸，而專門揭發名人整容、名為「恐怖整容手術」嘅網站（網址：www.AwfulPlasticSurgery.com），日前登咗幾張瑪麗分別喺九四同九七年胸部逐步「發育」嘅舊相，當時瑪麗就算着住低V都冇乜睇頭，不過睇番近期嘅相，瑪麗明顯胸前偉大，稍為露一露都非常有睇頭，難怪俾人話佢隆胸。其實瑪麗近年人氣不振，風頭俾一眾小天后搶晒，若果佢再唔諗諗計，好快就要摺埋。
此外，瑪麗嘉兒近日接受英國報章訪問時透露，原來佢有搭𨋢恐懼症，唔知係咪因為佢嘅負荷特別大，佢重投訴英國啲𨋢非常迫狹，佢話：「英國嘅𨋢好似細過美國嘅𨋢好多，我覺得被困喺入面嘅感覺好辛苦，一啲都唔好受。所以我即使喺二十樓，都會選擇行樓梯，就算着住『斗零踭』都係咁話。」