噚晚班行會現任同前任非官守成員食飯，請舊老細董建華夫婦喺港島香格里拉夏宮食飯，大部份人都好畀面，只有錢果豐同王䓪鳴因為遠行缺席，其餘十六人包括大蛇鍾士元、楊鐵樑、梁錦松、唐英年、廖長城、田北俊、周梁淑怡、查史美倫、梁振英、陳智思、鄭耀棠、譚耀宗、曾鈺成、方黃吉雯、李業廣、鍾瑞明，都有到齊。
阿松氣色唔錯，但問佢點睇曾蔭權做特首，似乎唔多「老利」，連問佢BB囡近況點都唔講。周梁就話，晚宴氣氛愉快，阿董主要係多謝班行會成員同佢一齊度過困難時期，又講自己下台後點調理身體，感到好輕鬆，但早前去上海度假，瘦咗六公斤。雖然隻腳重有問題，但生活增添好多樂趣，因為多咗時間同孫女玩，行會成員夾份送咗隻銀色紀錄碟，上面祝阿董「榮升」國家領導人，做政協副主席。
譚耀宗就話，民建聯二十二號喺華潤頂樓宴請阿董，重會送條民建聯黨呔畀阿董。
傳真︰2623-9278
電郵︰[email protected]