商會Ｃ叫左丁山趁去沙田馬場之便試吓商會廂房，左丁山敬謝不敏。大凡會所廂房，設於馬場一號看台者多數位置唔錯，直望終點。設於二號看台七樓嗰邊，你要咯，望落去就係轉彎入直路，有排都未到終點。會所廂房最大嘅缺點就係食物千篇一律，收費不便宜兼且唔好食，去多幾次就冇癮，認真唔啱口味，就算收費最貴之「馬會廂房」（JockeyClubBox）亦如是，一般會所廂房更加差啲。
識商會Ｃ咁耐，講嘢唔使客氣，如實告之，商會Ｃ亦承認此點，話收到好多商會會員投訴，指商會廂房（其實個個廂房都差唔多）嘅食物質素唔掂，要求改善，商會Ｃ向馬會餐飲部（F&B）反映，據佢講：「碰到一鼻子灰，冇人理你！」左丁山聽咗，幾驚奇，因為自己入馬場多年，可以證實入場觀眾會員，一年比一年少，冇理由馬會馬場餐飲部毫無危機意識，不思改進㗎？今時今日咁嘅服務態度，點吸引馬迷到會所廂房呀？馬場啲中菜就唔同，左丁山鍾意食中菜，多年來覺得水準可以保持，不時有佳作，會員冇乜complain，只係投訴每逢大賽日（如打吡、年初三、國際賽）就會人手短缺，搞到廚房出菜慢，侍應好好禮貌都冇用。馬場中菜可以與任何一間中環、灣仔、銅鑼灣一流食店比較拉勻唔會輸蝕。至於點解跑馬之日馬場啲西式自助餐與中菜之分別如此大，木宰羊。
商會Ｃ十分勞氣，大概係俾佢嘅商會會員抦得多之故，有冤無路訴，左丁山寄以同情，邀請佢逢賽馬日到中菜廳一試，最多我請。公家事，太多勞氣，多人投訴，取消，唔要個商會馬場廂房咪算囉。