假後個市屬於太平，恒指升48點。兩隻國內電訊股中移動（941）與聯通（762），分別升0.45元與0.30元，扯高恒指40點，即係話其他成份股計埋得牛皮兩個字。搵近期冇乜點升嘅藍籌，吼佢哋嘅C輪，搵銀之道。中移動C輪4571與3870，分別升21%與11%，係中移動調整得快彈得急嘅結果。
滙控C輪：滙控（005）喺122.50元低位搵到支持，已經有5日，收123元，近期落後，可以睇番好啲，預期PE13.2倍，入於超值，可以博升番幾蚊。
滙控C輪近期散晒，幾個仙嘅C輪，有啲槓桿率講緊一二百倍，不過溢價去到一二十個巴仙，最後死火多過唔死火，貪唔過。4441與4445最啱睇，槓桿率66倍與112倍，好爆炸，而溢價2.2%與3.3%，又唔離譜。用毫幾子買發達夢，有得諗。
未來兩個月正股起番幾蚊，揸兩隻輪會肥到無法綁鞋帶。當然，正股如果繼續係牛喺123元或者跌些少，則兩隻輪就會所剩無幾。
新地C輪：新地（016）企定喺70.75元，7字大關有穩如鐵塔之勢，個市氣氛漸佳，新地股價有望向上移，收番啲C輪有着數。𠵱家揸新地C輪，唔使理派息嘅因素，溢價吸引嗰隻就買嗰隻。
正路之選，係4643。4643現價25.5仙，過去11日內幾乎散咗1半。隻輪6月初夠鐘，溢價2.5%，槓桿率27.7倍（有效16.5倍），引伸波幅18.2%。結合所有數據，其他C輪冇隻夠佢嚟。
聯通C輪：聯通升5%，聯通C輪最威者升36%至46%。睇吓數據，溢價9%至33%。正股會飛咩？聯通C輪，咪多手。
章盛