職業訓練局轄下嘅中華廚藝學院俾人投訴濫用公帑，每年花巨款購買昂貴嘅食物作為教材，又買等離子電視，又設立豪華雪茄房等，重話花咗成五十萬購置用作學員點名嘅指模機㖭！報道出街之後，職訓局同廚藝學院都好緊張，即時請傳媒去食餐飯急住解畫，重順便帶八方同班行家入埋佢哋嘅廚房，實地了解一下。
行咗個圈，八方睇過啲設施，好似被投訴嘅「豪華」魚缸同「豪華」雪茄房等等，咁睇落的確唔似太豪華嘅，至於指模機就冇講到亦冇睇到喇。新聞主任一再解釋，學院嘅所有設施唔係好似投訴所指咁貴，重全部係教學嘅需要。不過點都好啦，話晒都係公帑，希望職訓局同廚藝學院再小心啲用，唔好再俾人投訴。
傳真︰2623-9278
電郵︰[email protected]