現年十八歲嘅日本少女偶像松浦亞彌近排積極轉走成熟路線，除咗喺寫真集收起招牌鬼馬動作，大騷淑女魅力之外，最近佢喺「午後之紅茶」嘅新廣告入面又着上阿拉伯性感舞衣，大晒玲瓏浮凸嘅成熟身材。
已經為「午後之紅茶」擔任咗三年代言人嘅松浦亞彌，最近為該牌子新推出嘅飲品拍咗輯廣告。每次為「午後之紅茶」拍廣告，松浦都鍾意搞搞新意思，以唔同形象示人，過往佢就試過以和服少女同歐洲貴婦等造型出現，令人印象難忘。而喺今次新廣告入面，佢就戴上黑色假髮，化身為阿拉伯跳舞女郎，加上近日松浦再度發育，着住低胸BRA-TOP嘅佢露出小蠻腰大跳肚皮舞，令廣告更有睇頭。
喺拍攝廣告當日，松浦只係即場用咗三十分鐘就學識跳肚皮舞。松浦喺廣告入面一手揸住酒杯，邊扭腰跳舞邊斟茶，但竟然一滴不漏兼一TAKE搞掂，令在場工作人員忍唔住拍手歡呼，可以提早收工。