面對土共叫罵聲不絕,曾爵士密謀組班,政務司司長人選,中環熱傳,將會係由新鴻基回塘嘅許仕仁!
許仕仁花名「肥龍」,同一早劈炮嘅「骨精強」黎慶寧,並稱「殖民地政府雙雄」,今次配合曾司長嘅強勢,就梗係「豪情」萬丈!許仕仁埋位,最厲害嘅就係,第一響定係做兩年就走,若然當撈曾連任,佢都會提早告老歸田,唔同你癲,呢一招即是擺到明,肥龍嘅職責,將會係前鋒敢死隊兼罪惡剋星,以後政壇嘅「厭惡性工作」(Dirtyworks),例如專程對付蔡菜子呢亭逢曾必反嘅「新瞓街」人士,肥龍將會成為暴龍,一啲都唔客氣!
原來早有分工,唔怪得當奴一反常態,面對蔡菜子嘅街市賣菜婆式辱罵,竟然一啲怒容都冇,反為滿面堆笑,幾乎重High到對住貌美如花嘅「北角呂秀蓮」吹埋口哨㖭!
肥龍做得兩年,即是置個人生死於度外,邊個肆意踩場搗亂,隨時攬住煲呔嘅政敵,同佢一齊碌落山坑,壯烈犧牲!至於唐唐,聽講亦一早向曾爵士輸誠歸順,因為肥龍兩年後退休上神枱,得到當奴頒授大紫荊榮升為「八部天龍」之後,政務司司長個位,將會由唐唐接任,再坐多五年,就可能輪到唐唐扶正嘞!
中方早有部署,所以「護法」王振民先至突然騎呢改口,話煲呔只會做七年!嘩,七年即是阿董搞殘香港咁耐嘅時光,點等呀?唔怪得土共紮紮跳咯!
今次老左大反撲,行動相當立體,除咗由蔡菜子在前台泥漿隻揪煲呔,文膽邵波波,亦公開向商界嘅誠哥叫陣,公然就誠哥嘅「千絲萬縷論」予以駁嘴,話唔怕千絲萬縷,最怕一絲一縷,向北京堆砌告狀!
誠哥早已避咗表態,話人格高尚,唔止煲呔,除咗一小撮,個個有份,點知咁都俾土共鎖定!唔知係咪咁,當奴整件許仕仁頂住先,未來兩年,肯定好睇!
許仕仁一向好辣,有名你叫,即「或許是人」,亦即或許不是人,或許是神,亦或許是鬼,都唔定,肥龍過江,肯定有排惡鬥咯!
傳真︰2623-9278
電郵︰[email protected]