八十九歲獨身的李會心婆婆，無依無靠，與年紀相若的「金蘭」姊妹同住。為防有意外時可即時求助，李婆婆希望安裝一部平安鐘，然而，退休後靠微薄積蓄過活的她，難以負擔，蘋果日報慈善基金即時於「平安鐘專戶」撥款相助，達成她的心願。
「雖然托賴𠵱家身體都冇乜好大問題，但始終年紀一路路大，我個姊妹又成日行開行埋返鄉下，都擔心有乜事冇人知，所以想裝番部平安鐘，至少有事都有人幫我報警。」無親無故的李婆婆對記者說。
李婆婆身世坎坷，生於內地的她，七歲喪父、九歲喪母，從此與弟弟相依為命；可惜未幾其弟弟亦不幸病逝，李婆婆連唯一親人也失去，孑然一身的她其後來港生活，一直靠打住家工維持生計，及至二十年前年老體衰才退休。「我幾十年嚟都係自己照顧自己，已經習慣晒，不過呢幾年真係冇用囉，行多幾級樓梯都喘氣。」李婆婆搖頭歎道。
李婆婆數月前因心臟不適，服藥多時，幸暫時沒有大礙。「嗰朝早起身，我突然覺得右半邊身手腳硬晒，冇力又郁唔到，嚇得我即刻去睇醫生，中醫師話我心臟唔係咁好，要慢慢調理，好彩食咗幾劑中藥之後就冇乜事，不過，自從呢次之後，我開始擔心自己嘅身體同安全問題。」
李婆婆在社工建議下，萌生安裝平安鐘的念頭，可是她經濟環境欠佳，難以自行負擔有關費用。李婆婆現居於多年前與「金蘭」姊妹聯名購置的舊唐樓單位，晚年靠微薄積蓄及生果金過活，平日要克盡節儉。
李婆婆表示︰「呢幢樓已經四十幾年，久不久就要夾錢維修，加上我又冇攞綜援，睇醫生、管理費、水電雜費統統要自己畀，真係好重皮，平日已經要死慳死抵，如果再要我自己畀錢裝平安鐘，我真係負擔唔到，我寧願唔裝。」
由於李婆婆並非綜援長者，因此不獲政府資助安裝平安鐘，蘋果日報慈善基金了解過李婆婆的境況後，已於「平安鐘專戶」撥款，資助她免費安裝及永久享用由長者安居服務協會提供的二十四小時緊急呼援服務。
蘋果基金與安居會於九六年合作成立「平安鐘專戶」，至今已有一千多人受惠。
專戶旨在幫助不合政府資助資格但有實際需要的長者及殘疾人士安裝平安鐘。
善長只要捐出一百元，便可資助一名弱老使用平安鐘一個月，捐出二千五百元更可資助一名有需要人士永久享用有關服務，盼善長多加支持，慷慨解囊。
「平安鐘專戶」捐款編號：C0650
暖流熱線
電話：29908688
傳真：23702192
電郵：[email protected]
網址： http://www.charity.atnext.com