自由行「攻陷」旺角後，經常聽見同事朋友取笑他們：「買乜都要講價，老土！香港邊有呢支歌仔唱呀？大百貨公司同電器舖老馮係明碼實價！」唔係喎，你搞錯，原來連鎖電器舖如百老滙、豐澤、國美和鐳射等，真係有價講、有贈品送，只要你唔怕醜，𦧲到就有！
記者：楊一凡
攝影：陳智良、陳陶鈞
Model：Ricky（D8）、Va
講價必殺技
1.揀促銷貨：產品上同時貼滿甚麼信用卡優惠、五年保養、三年維修又另送贈品等，明顯與眾不同，擺明要清貨，呢類最易講！
2.聲東擊西：同Sales講價時話：「第二間平啲又可以免息喎！」但出招前記緊要格過價，知行情先可以「大」Sales。
3.循序漸進：當售貨員主動減價時，不妨扮考慮，其間不住問電器功能，彈番一兩句。待獲得再減價後，最後一擊：話畀現金，必定可再獲減價。
最勁減足一萬蚊
百老滙、中原、豐澤和鐳射等名牌連鎖電器店，跟足消費者條例玩明碼實價，按照一般香港人的慣例，意味着無價講！不過店裏標出來的價錢略為偏貴，鬼咩賣咁多廣告，成本自然高！
不過最近在互聯網新聞組發現網友留言，說旺角、尖沙嘴、銅鑼灣等旺區的連鎖店有價講，可能是受自由行影響。記者和攝影師來到旺角西洋菜街，隨機抽樣選擇唔同電子產品講價，這條街充滿名牌連鎖電器店，百老滙有六間，中原都有三間咁多。講價結果，出乎意料，大小電器果然有價講：以推出僅一個月的等離子42吋電視機為例，最低可減足一萬多；就算數千元的新款數碼相機亦有價講，減價約二百蚊咁多，打死不減的就送超值贈品。最搞笑係男女講價，結果都有分別！
連鎖店Sales爆料：孭Quota累事
記者成功訪問一位不願透露姓名的連鎖電器店現職Sales，他解釋：「講價是真有其事，店內標正價係因為要向供應商交代。通常個客唔講價即刻磅水，我哋梗係唔會多嘴。但如果啲客問開有無得平啲，我哋都會自動減價，或者送贈品。」
Sales最後更大吐苦水，講出減價原因：「我哋每個月要交數（銷售配額），例如一個月要賣夠10萬銀Quota，咁唔減價點Fit到公司指標？好似一部機標價$4,300，個客詐型話第二間平過我，咁我咪賣$4,000呢個員工價囉！講真我無賺㗎，賣$4,300我就收到佣，賣$4,000分分鐘已經係來貨價無佣賺，但起碼我可以保住份大糧（基本底薪）。呢樣嘢公司反而有So（着數），因為個總額一旦跳Bar（超過某個數額），供應商就會再畀Bonus公司或者再㩒低個來貨價。」
官方回應：我哋唔鼓勵
在講價行動期間，我哋亦同時致電各大電器連鎖店的公關部查詢，但到截稿前僅得到豐澤電器的官方回覆。豐澤公關回應說：「我哋支持消委會的明碼實價指引，不過因為市場競爭大，我哋亦會靈活運用現金Coupon和贈品以吸引顧客。」
男女講待遇不平等
記者和攝影師經過一連串的講價行動後總結，發現原來女仔講價，攞到的贈品較男仔多！以CasioEXILIMZOOMEX-Z57數碼相機為例，在同一間電器舖問價講價，雖然女仔和男仔都未能把實價$3,480再減低，但女仔就攞到迷你腳架、螢幕貼紙、3M抹相機鏡頭絨布及12個月免息分期等甜頭；相反男仔僅取得腳架。賽後檢討：女仔肯花較多時間討價還價及考慮，而且購物態度猶豫，不斷左問右問，店員惟有以幾十元的小恩小惠贈品利誘。所以話，點都係女仔着數啲！
講價事件簿
Case1：畀現金慳過萬
目標：PhilipsPlasma42PHS9966
店舖：鐳射Citicall
店面價：$37,990
講價後：$27,500
過程：店員得知記者付現金後，自動減價至$29,000，兼送$3,100Philips15吋薄Mon，睇電視或駁電腦都OK。記者表示家中已有電腦Mon，店員話唔要15吋Mon可再減$1,500。店員見記者十五十六，提議先以信用卡付訂金，若回家後覺不合意可全數退回。店員更說：「減咁多因為未填夠今日的Quota！」
激減$10,490
Case2：隔籬平啲減多啲
目標：SonyWegaKLV-L32M1
店舖：百老滙
店面價：$29,888
講價後：$21,500
過程：傾唔到兩句Sales自動減至$24,888，攝影師指出第二間店價錢更低，Sales再把售價調低至$22,000，更說：「若果畀現金只要$21,500，重送你DVD機、《哈爾移動城堡》戲票和Miffy公仔等贈品。」
激減$8,388
Case3：分店售價各不同
目標：CasioEXILIMZOOMEX-Z57
店舖：百老滙、鐳射、國美、豐澤和中原
店面價：$3,480
講價後：中原$3,298；其他店唔肯減，最着數百老滙送256MB及128MBSD卡、腳架、抹鏡布及貼紙。
過程：百老滙、鐳射、國美和豐澤劃一價$3,480唔肯減，頂多送贈品。唯獨中原其中一家分店（西洋菜南街1A號百寶利商店)一埋位自動減至$3,298，店員拍心口：「你唔使格價，實係全街最平！」「點解前面間中原唔減價？」「同一集團，每間舖都唔同老細，我哋舖面係全條街分店最大，Casio響我哋店有專櫃，老細同Casio傾掂，呢批貨有折頭，賣平啲。」
激減$182
Case4：手機賤賣員工價
目標：Nokia7610
店舖：國美
店面價：$4,380
講價後：$4,080
過程：店員話：「無得再平畀你，呢個已經係員工價，我自己買都要畀咁多，根本無得賺！」
激減$300
