本欄是勞工處與《蘋果日報》合辦，逢星期四刊出，旨在為勞資雙方解釋有關僱傭問題，如有任何疑問，可致電勞工處熱線：27171771查詢，此熱線會由政府熱線「1823」職員接聽。
容太：文嬸，你個樣好唔妥喎，唔舒服呀？
文嬸：天氣時好時壞，想唔病都難，我腸胃炎已經成個星期，睇極醫生食極藥都係咁。
容太：淨係食藥唔得㗎，最緊要多啲休息，你醫生冇寫病假畀你咩？
文嬸：有，重係四日㖭，不過成四日冇人工，重要畀錢請替工，好肉赤！
容太：點可以咁㗎，員工放病假，老闆係應該作出適當人手安排同支付替工嘅工資，唔應該要求員工自己請替工或畀替工人工㗎喎。
文嬸：咁就算唔使出錢請替工，我都唔想無咗幾日人工！
容太：有疾病津貼嘛！根據《僱傭條例》，按「連續性合約」受僱嘅僱員，即係個僱員連續受僱於同一僱主四星期或以上，而每星期最少工作十八小時，如果佢符合法例嘅規定，就可以享有相等於正常工資五分之四嘅疾病津貼。
文嬸：乜嘢叫做符合法例規定呀？
容太：即係如果病假唔少過連續四日，僱員能夠出示適當嘅醫生證明書，而又累積足夠嘅有薪病假，僱員就可以享有疾病津貼。根據法例，僱員在最初受僱嘅十二個月裏面，每做滿一個月可累積兩日有薪病假，之後每做夠一個月可累積四日，最高可累積到一百二十日。
文嬸：哦，似乎我老闆都唔清楚呢啲法例嘅嘢，我要快啲講番畀佢知先得。
資料提供：勞工處勞資協商促進科
服務熱線
電話：29908288
傳真：23702192
電郵：[email protected]