葉德嫻稍後會假紅館舉行演唱會，有感香港太多歌手不準時開騷，令到觀眾養成「例遲」的習慣，葉德嫻直言此風不可長，故千叮萬囑觀眾要準時入場，如未能準時到場便要在紅館外罰企十五分鐘。
葉德嫻（Deanie）下月二十與二十一日假紅館舉行兩場名為「葉德嫻星之旅演唱會」，Deanie穿上西裝褸配低胸襯衫，昨日在黃埔海逸酒店舉行記者會，倫永亮見狀即叫她「烏低身」，令到Deanie笑不攏嘴。
Deanie一向都有自己的原則，她提醒觀眾記得準時入場，因為自己一定不會遲開騷，Deanie說：「人哋外國做騷一定準時，點解香港唔得，不過有時又唔怪得啲觀眾，我知道有啲歌手成八點九先開場，呢啲就真係抵打，此風不可長，我哋都係大都市嘅人，有讀過書，耕田聽到雞啼都識起身，開演唱會點可以遲？好影響睇騷嘅人，咁樣好唔公平囉。」葉德嫻更表示觀眾如未能準時入場，就要在紅館門口罰站十五分鐘。
Deanie昨穿上低胸衫，她問記者：「我唔會太低胸嘛？」記者笑言未夠低，她就答：「咁我喺演唱會度露三點好唔好，眼耳口呢三點。」她表示是次演唱會與主辦單位曾有一些拗撬，不過已得到共識，她說：「佢想我開四面台，但我覺得控制唔到，同埋中間我一定要有十五分鐘嘅休息，畀啲觀眾去廁所，我又可以休息吓。」
此外，Deanie透露最近許志安送了一條絲巾與一張六位數字的支票給她，Deanie說：「我好多謝佢，我明佢可能想多謝我同佢合唱同埋做佢演唱會嘉賓，不過呢張支票我係唔會兌現嘅。」
採訪、攝影：胡比