「北角呂秀蓮」蔡素玉小姐周日發炮，指口篤鼻狠批特區新紅人煲呔，認真有料到，好睇過《帝國反擊戰》。
大家都心知肚明，蔡菜子一定有土共撐腰，先敢咁惡死，咁香港土共最高領導唔知重係咪高祀仁？如果係，班行家可以問吓佢篇文係出自邊個嘅手筆。
土共同港英餘孽梗係牙齒印多，直情係勢不兩立，八方舉一個大紫荊獎提名古仔為例就好易明白。話說當年重係陳四萬做政務司司長兼勳章審查委員會主席，班土共想頒個大紫荊畀培僑中學前校長及校監吳康民，點知四萬唔贊成，話香港好似佢咁嘅中學校長有好多，言下之意係佢對香港冇乜大貢獻可言（又係真喎），雖然吳康民後來梗係可獲老董頒大紫荊獎啦，但四萬嘅評語就喺左派流傳，成為死罪！
所以話，換咗煲呔坐正，班土共一家冇啖好食，「愛國價值被蔑視」，肯定連獎牌都冇份，𠵱家唔作出反抗，第時邊有好日子過？
傳真︰2623-9278
電郵︰[email protected]