飲食人誌︰潮爆關西新口味灼炸炒煨爆炒拉麵

時裝界名牌鍾意出YoungLine副線攻後生仔市場，食界亦好此玩意，新開張的六本木，便是走中高檔路線的郎田居酒屋的姊妹店，新店菜式以創新料理為主打，價錢較經濟，獨賣鎮店之作「爆炒拉麵」更是潮爆日本關西的新興口味，如此食界潮店，自認潮友食家又點可以聞所未聞？

記者：黃婉冰　
攝影：陳陶鈞　模特兒：Vicky

關西每日限賣30碗

「爆炒拉麵」原名「湯炒拉麵」（Yakiramen），是關西大阪市麵店「久留米拉麵豚一」老闆宮西敦士自創菜式，此人氣潮食一出即獲當地多本雜誌力撐，更獲《Kansai一週間》頒發的「關西拉麵新人賞」，但因烹調方法比普通拉麵繁複，要灼、炸、炒、煨，先把拉麵用熱水灼一灼，後用油輕輕一炸至麵條帶油香產生細小氣孔，令醬汁更易入味，最後加入濃郁豬骨湯及配料，爆炒輕煨至湯汁變稠才可，故每日限賣30碗，家陣香港有得食又無限量供應，香港人都算有運行！

■老闆宮西敦士手捧原裝正版「湯炒拉麵」。

後生仔女要新要潮貪新鮮，新店菜式除基本的幾款壽司及拉麵外，還有破格創新的主打菜「爆炒拉麵」。「爆炒拉麵」是日本關西新興潮食之一，味道比傳統豬骨湯拉麵更濃更惹味，價錢大眾化，每人平均擺低80多元已可捧腹下樓，老闆Danny堅持用料新鮮、食物多元化，故餐牌除固有的80多款菜式外，還會不停加入新口味，當中不乏合時季節性菜式，讓客人保持新鮮感。