呢一排唔知係唔係因為冇嘢好炒，所以好多股仔在毫無原因及先兆下無厘頭炒高，確係令人難明。
不過，經紀陳話實情唔係咁，其實好多股份唔係亂咁炒，內裏多數有文章。好似九洲發展（908）連續升咗幾日，而成交量愈來愈大，就知道唔係乾炒咁簡單。
經紀陳話，九洲前身係珠光發展，由於阿媽珠光集團因本身財務問題，先至轉手畀目前呢位大股東，而家陣嘅新大股東與舊大股東其實都係珠海市政府內的成員，近排新聞提到興建港珠澳大橋，作為珠海市政府的成員公司，有人憧憬九洲可以從中參與發展並唔係冇道理，至於係何種形式，則可能要稍後先知。
九洲昨日再升8.38％，收0.70元，成交股數有2128萬股，金額1478萬元。
另外，經紀黃又推介實力股港機工程（044），佢話公司幾個大客如港龍航空等都諗住增購飛機，肯定對做飛機維修的港機有幫助，加上公司向來踏實，現金流量強勁，夠晒穩陣。早排有歐資行出報告推介港機，之後重身體力行買入，股價日日升些少，昨收50.50元，有力挑戰新高。
慕容小初